O‘zbekistonning Jahon Savdo Tashkilotiga (JST) qo‘shilishi jarayoni sekinlashayotgani haqida xavotirlar kuchaymoqda. Bu haqda Zamin.uz xabar berdi.
Bu haqda Prezidentning JST bo‘yicha vakili Azizbek Uronov ma’lum qildi. Uronovning ta’kidlashicha, jarayonning bunday kechikishi ishchi guruh tomonidan berilayotgan ayrim savollarning mazmuni, muddati va mohiyati bilan bog‘liq.
Shu bilan birga, O‘zbekiston Jahon Savdo Tashkilotining adolat tamoyillari va global savdoning barqarorligini ta’minlashga qaratilgan qadriyatlarini qo‘llab-quvvatlaydi. Uronovning so‘zlariga ko‘ra, mamlakat tashkilot a’zoligini biror imtiyoz sifatida emas, balki xalqaro savdo tizimiga to‘liq integratsiyalashuv imkoniyati sifatida ko‘radi.
Hozirda O‘zbekiston JSTga a’zo davlatlar bilan bozorga kirish imkoniyatlari bo‘yicha muzokaralarni davom ettirmoqda. Shu kungacha respublika tashkilotning 33 ishtirokchisi bilan muzokaralarni yakunlab, 30 mamlakat bilan tegishli protokollarni imzolagan.
Kelgusi hafta esa Toshkent Moskva bilan tegishli kelishuvni imzolashi kutilmoqda. Ma’lumotlarga ko‘ra, O‘zbekistonning JSTga qo‘shilish jarayoniga yordam 1990-yillarning o‘rtalaridan buyon ko‘rsatilmoqda.
Joriy yilning yozidan boshlab bu jarayonni Janubiy Koreya diplomati boshqarib kelmoqda (manba: one.uz).
