22–25-dekabr: Qor, tuman va yaxmalak kutilmoqda
O‘zgidromet xizmati 22–25-dekabr kunlari uchun ob-havo prognozini taqdim etdi. Bu haqda Zamin.uz xabar berdi.
Ma’lumotlarga ko‘ra, hafta boshida respublika hududlarida havo o‘zgaruvchan bo‘lib, ayrim joylarda qor, tuman va yaxmalak kuzatilishi mumkin. Qoraqalpog‘iston va Xorazmda yog‘ingarchilik kutilmaydi, ammo tuman tushishi ehtimoli mavjud.
Kechalari havo sovuq bo‘lib, kunduzi harorat 0–7 daraja iliq bo‘lishi kutilmoqda. Buxoro va Navoiy viloyatlarida 22-dekabr kuni ayrim joylarda yengil qor yog‘ishi mumkin.
Keyingi kunlarda esa havo asosan quruq bo‘ladi. Yo‘llarda yaxmalak kuzatilishi ehtimoldan xoli emas.
Toshkent, Sirdaryo, Samarqand va Jizzax viloyatlarida ham 22-dekabr kuni ba’zi hududlarda qor yog‘ishi ehtimoli bor. Keyingi kunlarda yog‘ingarchilik kutilmaydi, ammo tuman va yaxmalak saqlanib qolishi mumkin.
Qashqadaryo va Surxondaryo viloyatlarida haftaning birinchi kunida qor yog‘ishi mumkin. Keyinchalik havo ochilib, yog‘ingarchilik kuzatilmaydi.
Farg‘ona vodiysida yog‘ingarchilik kutilmayotgan bo‘lsa-da, ayrim joylarda tuman kuzatilishi ehtimoli bor. Tog‘li hududlarda 22–23-dekabr kunlari qor yog‘ishi va ayrim joylarda qor ko‘chishi xavfi mavjud.
Mutaxassislar haydovchilarga yo‘llarda ehtiyotkor bo‘lishni tavsiya etmoqda. Manba: O‘zgidromet.
