Toshkentda birinchi O‘zbek-Yapon universiteti ochiladi
O‘zbekiston Prezidenti Shavkat Mirziyoyev va Yaponiya bosh vaziri Sanae Takaichi Tokio shahrida bo‘lib o‘tgan muzokaralarda Toshkentda birinchi O‘zbek-Yapon universitetini tashkil etish bo‘yicha kelishuvga erishdilar. Bu haqda Zamin.uz xabar berdi.
Ushbu loyiha Yaponiyaning nufuzli oliy ta’lim muassasalaridan biri bo‘lgan Tsukuba universiteti ishtirokida amalga oshiriladi. Yangi universitet Toshkentda faoliyat yuritadi va O‘zbekiston hamda Yaponiya o‘rtasidagi birinchi qo‘shma ta’lim muassasasi hisoblanadi.
Bu dargohda muhandislik, axborot texnologiyalari, amaliy fanlar va boshqaruv kabi zamonaviy yo‘nalishlar bo‘yicha mutaxassislar tayyorlash rejalashtirilgan. Shuningdek, universitetda amaliy ta’lim, akademik almashinuv dasturlari va yapon oliygohlari bilan qo‘shma faoliyatga alohida e’tibor qaratiladi.
Ushbu loyiha natijasida O‘zbekistonda yuqori malakali kadrlar tayyorlash, ilmiy hamkorlikni rivojlantirish va oliy ta’lim tizimiga yapon standartlarini joriy etish ko‘zda tutilgan. Mazkur universitetni tashkil etish bo‘yicha kelishuv O‘zbekiston va Yaponiya o‘rtasidagi strategik sheriklikni mustahkamlash yo‘lidagi muhim qadam hisoblanadi.
Manba: zamin.uz
