Toshkentda Yangi yil tadbirlari 25-dekabrdan boshlanadi
Toshkent shahrida Yangi yil bayramiga bag‘ishlangan ommaviy tadbirlar 2025-yil 25-dekabrdan 2026-yil 10-yanvargacha davom etadi. Bu haqda Zamin.uz xabar berdi.
Asosiy bayram tadbirlari Alisher Navoiy nomidagi O‘zbekiston Milliy kutubxonasi maydonida o‘tkaziladi. Ushbu tadbirlar har kuni soat 11:00 dan 23:00 gacha tashkil etilishi rejalashtirilgan.
Shuningdek, bayram dasturlari shaharning turli tumanlarida ham bo‘lib o‘tadi. Masalan, Yunusobod tumanida Riksiliy 24/7 gastronomik ko‘chasi, Bektemirda “Compass” savdo majmuasi va “Coca-Cola Garden” bog‘i, Mirobodda Taras Shevchenko 24/7 ko‘chasi, Mirzo Ulug‘bek tumanida esa “Central Park” va “Yangi O‘zbekiston bog‘i” asosiy bayram manzillari sifatida belgilangan.
Chilonzor tumanida “Dream Park”, “Humo Arena”, “Magic City” va Al-Xorazmiy 24/7 ko‘chasi bayramga mezbonlik qiladi. Shayxontohur tumanida “Anhor Lokomotiv” bog‘i va “Tashkent City” majmuasi, Yashnobodda “Ashxobod” sayilgohi, Yakkasaroyda “NEXT” savdo majmuasi, Yangihayotda esa Mehrigiyo 24/7 ko‘chasi bayram tadbirlari uchun ochiq bo‘ladi.
Bayram kunlari davomida konsertlar, ko‘rgazmalar va turli ko‘ngilochar dasturlar tashkil etilishi kutilmoqda. Ushbu tadbirlar haqida batafsil ma’lumot Toshkent shahar hokimligi matbuot xizmatida e’lon qilingan (manba: zamin.uz).
