MDH davlatlari rahbarlari Sankt-Peterburgda uchrashdi
Prezident Shavkat Mirziyoyev 22-dekabr kuni Sankt-Peterburg shahrida joylashgan "Ermitaj" davlat muzeyida Mustaqil Davlatlar Hamdo‘stligi (MDH) davlatlari rahbarlarining norasmiy uchrashuvida ishtirok etdi. Bu haqda Zamin.uz xabar berdi.
Ushbu tadbirda Rossiya prezidenti Vladimir Putin, Belarus prezidenti Aleksandr Lukashenko, Qozog‘iston prezidenti Qosim-Jo‘mart To‘qayev, Qirg‘iziston prezidenti Sadir Japarov, Tojikiston prezidenti Imomali Rahmon, Turkmaniston prezidenti Serdar Berdimuhamedov va Armaniston bosh vaziri Nikol Pashinyan ham qatnashdi. Mazkur uchrashuvda joriy yilda amalga oshirilgan hamkorlik ishlari sarhisob qilindi va kelgusi yil uchun ustuvor vazifalar belgilandi.
Shuningdek, mintaqaviy va xalqaro ahamiyatga ega dolzarb masalalar yuzasidan fikr almashildi. Uchrashuv davomida MDH doirasidagi iqtisodiy aloqalarni yanada rivojlantirish masalalariga alohida e’tibor qaratildi.
Jumladan, o‘zaro tovar ayirboshlashni oshirish, transport sohasidagi hamkorlikni kuchaytirish, investitsiyalar o‘sishini rag‘batlantirish va qo‘shma kooperatsiya loyihalarini qo‘llab-quvvatlash muhimligi ta’kidlandi. Shuningdek, energetika va raqamlashtirish sohasida yaqin sheriklikni rivojlantirish masalalari muhokama qilindi.
Madaniyat, san’at, ta’lim va fan sohalarida hamkorlikni kengaytirish, hududlar o‘rtasida uzoq muddatli aloqalarni rivojlantirish, shuningdek, yoshlarning ijodiy va intellektual salohiyatini qo‘llab-quvvatlash zarurligi qayd etildi. MDH mamlakatlari o‘rtasida madaniy va gumanitar almashinuvlarni davom ettirish, innovatsion loyihalarni qo‘llab-quvvatlash ham ustuvor vazifalar sifatida belgilandi.
Manba: zamin.uz
