Shavkat Mirziyoyev Ermitaj muzeyiga tashrif buyurdi
O‘zbekiston Respublikasi Prezidenti Shavkat Mirziyoyev Sankt-Peterburg shahrida bo‘lib o‘tgan MDH davlatlari rahbarlarining norasmiy uchrashuvi doirasida «Ermitaj» davlat muzeyiga tashrif buyurdi. Bu haqda Zamin.uz xabar berdi.
Prezident boshqa davlat rahbarlari bilan birgalikda dunyodagi eng yirik muzeylardan biri hisoblangan ushbu madaniy maskanning ekspozitsiyalari bilan yaqindan tanishdi. Tashrif davomida mehmonlar Rossiya va Yevropa tarixi hamda badiiy merosining muhim bosqichlarini o‘zida aks ettirgan Bosh muzey majmuasining zallarini tomosha qildi.
Delegatsiyalar rahbarlari Aleksandr zaliga tashrif buyurib, badiiy kumushdan yasalgan noyob buyumlar ko‘rgazmasini ko‘zdan kechirdi. Shuningdek, tantanali marosimlar o‘tkaziladigan Piketlar zali va Gerblar zalida bo‘lishdi.
Tashrif chog‘ida mehmonlar Kichik Ermitajning Pavilonlar zalida joylashgan afsonaviy «Tovus» mexanik soati va qimmatbaho buyumlar saqlanuvchi Oltin xazina bilan ham tanishib, ushbu eksponatlar ularda katta qiziqish uyg‘otdi. Mazkur tashrif davomida madaniy aloqalarni mustahkamlash, tarixiy merosni asrab-avaylash va MDH davlatlari o‘rtasida gumanitar hamkorlikni rivojlantirish masalalari muhokama qilindi.
Manba: zamin.uz.
