Prezident Shavkat Mirziyoyev 24-dekabr kuni Surxondaryo viloyatini rivojlantirish, yangi ish o‘rinlarini yaratish va kambag‘allikni kamaytirish masalalari bo‘yicha yig‘ilish o‘tkazdi. Bu haqda Zamin.uz xabar berdi.
Ma’lum qilinishicha, so‘nggi sakkiz yil davomida viloyatga 3 milliard dollar miqdorida xorijiy investitsiyalar jalb qilinib, 4 mingta sanoat korxonasi ishga tushirilgan. Natijada, viloyatdagi sanoat mahsulotlari hajmi ikki barobarga oshib, 2023-yilda 17,2 trillion so‘mga yetishi kutilmoqda.
Kambag‘allikni kamaytirish borasida ham ijobiy ko‘rsatkichlarga erishilgan. Joriy yilda 126 ming oila kambag‘allikdan chiqarilishi kutilayotgani va kambag‘allik darajasi 9,3 foizdan 5,6 foizgacha pasayishi rejalashtirilgan.
Bundan tashqari, “To‘palang” suv ombori orqali viloyatdagi 2 million aholining ichimlik suvi muammosi hal qilingan. Biroq viloyat sanoat, qishloq xo‘jaligi, xizmat ko‘rsatish va turizm sohalarida hali boshqa hududlardan ortda qolayotgani ta’kidlandi.
Meva-sabzavot eksporti hajmi past bo‘lib, mehmonxonalar soni ham yetarli emas. Shu sababli, kelgusi yilda qazilma boyliklarni o‘zlashtirish va turizm salohiyatini rivojlantirishga qaratilgan yangi loyihalar amalga oshirilishi belgilandi.
Yig‘ilishda viloyat hokimi yangi loyihalar bo‘yicha taqdimot o‘tkazdi. Davlat rahbari yo‘llarni ta’mirlash, uy-joy qurilishi va ijtimoiy infratuzilmani yaxshilash bo‘yicha topshiriqlar berdi.
Shuningdek, drayver loyihalar uchun mablag‘ ajratish va 9 mingta yangi ish o‘rinlarini tashkil etish rejalashtirildi.
