Jizzaxda to‘rtta atom energobloki qurilishi rejalashtirilmoqda

O‘zbekiston hukumati kelajakda mamlakatda atom energetikasini rivojlantirishni jadallashtirish imkoniyatlarini ko‘rib chiqmoqda. Bu haqda Zamin.uz xabar berdi.

Bu haqda Atom energiyasi agentligi rahbari Azim Ahmedxodjayev ma’lum qildi. Unga ko‘ra, Jizzax viloyatidagi tanlangan hududda to‘rtta yirik atom energoblokini qurish imkoniyati mavjud.

Loyihaning dastlabki rejasida ikkita kichik modulli reaktor va ikkita yuqori quvvatli energoblok qurilishi nazarda tutilgan edi. Ammo texnik imkoniyatlar o‘rganilgach, bu ko‘rsatkichni oshirish ehtimoli ko‘rib chiqilmoqda.

Rejalashtirilayotgan energobloklar Rossiyada ishlab chiqilgan VVER-1000 turiga mansub bo‘lib, ularning yuqori ishonchliligi va samaradorligi o‘nlab yillik tajriba bilan tasdiqlangan. Har bir energoblok uchun ikkita sovutish minorasini qurish rejalashtirilgan.

Shuningdek, loyihada qurilish-montaj bazasi, meteorologik stansiya, xavfsizlik zonalari va yuqori kuchlanishli elektr uzatish liniyalari tashkil etilishi ko‘zda tutilgan. O‘zbekistonning 2040 yilgacha mo‘ljallangan energetik strategiyasida atom energetikasini rivojlantirish muhim o‘rin tutadi.

2030 yilga kelib atom elektr stansiyalari 0,3 GVt quvvatni ta’minlashi, 2040 yilga borib esa bu ko‘rsatkich 4 GVtga yetishi kutilmoqda. Ushbu loyihalar mamlakatning energetik xavfsizligini ta’minlash va ko‘mirga bo‘lgan qaramlikni kamaytirishda muhim ahamiyat kasb etadi.

Mutaxassislarning fikriga ko‘ra, reaktorlar sonini oshirish bo‘yicha qarorlar faqat iqtisodiy tahlillar natijasiga asoslanib qabul qilinadi. Jizzax viloyati esa uzoq muddatli atom energetikasi rivojlanishi uchun strategik poydevor sifatida ko‘rilmoqda.

Manba: upl.uz.