O‘zgidromet markazi 25-dekabr kuni uchun ob-havo prognozini e’lon qildi. Bu haqda Zamin.uz xabar berdi.
Ma’lumotlarga ko‘ra, payshanba kuni O‘zbekiston hududida havo harorati nisbatan ko‘tarilib, qishga xos yumshoq ob-havo kuzatiladi. Toshkent shahrida havo o‘zgaruvchan bo‘lib, yog‘ingarchilik kutilmaydi.
Sharqdan esayotgan shamolning tezligi sekundiga 3–8 metrni tashkil etadi. Harorat kechasi 0–2 daraja iliq, kunduzi 10–12 daraja iliq bo‘lishi kutilmoqda.
Qoraqalpog‘iston Respublikasida ayrim hududlarda yomg‘ir yoki qor yog‘ishi, tuman tushishi mumkin. Kechasi harorat 3 daraja sovuqdan 2 daraja iliqqacha bo‘lsa, kunduzi 0–5 daraja iliq bo‘ladi.
Xorazm viloyatida esa yog‘ingarchilik kutilmaydi, kunduzi havo harorati 2–7 daraja iliq atrofida bo‘ladi. Buxoro va Navoiy viloyatlarida ob-havo barqaror bo‘lib, ayrim joylarda tuman tushishi mumkin.
Kunduzgi harorat 7–12 daraja iliq bo‘lishi prognoz qilinmoqda. Toshkent, Sirdaryo, Jizzax va Samarqand viloyatlarida esa kunduzi 8–13 daraja iliq havo saqlanadi.
Qashqadaryo va Surxondaryo viloyatlarida yog‘ingarchilik kuzatilmaydi. Ushbu hududlarda kunduzi havo harorati 8–13 daraja iliq bo‘lishi kutilmoqda.
Andijon, Namangan va Farg‘ona viloyatlarida esa kunduzi harorat 3–8 daraja iliq bo‘ladi. Tog‘oldi va tog‘li hududlarda yog‘ingarchilik kuzatilmaydi, biroq ayrim joylarda shamol kuchayishi mumkin.
Kunduzi harorat 3–8 daraja iliq bo‘lishi taxmin qilinmoqda. Mutaxassislar havoning iliqlashishi sababli atmosfera inversiyasi kuchayishi va PM2,5 hamda PM10 zarrachalari pastki qatlamlarda to‘planishi mumkinligini ta’kidlamoqda.
Ushbu holat hafta oxirigacha saqlanishi ehtimoli bor. Ma’lumot manbasi: O‘zgidromet.
