Turizm qo‘mitasiga Abdulaziz Aqqulov rahbar bo‘ldi
Ekologiya va iqlim o‘zgarishi vazirligi qoshida faoliyat yurituvchi Turizm qo‘mitasiga yangi rahbar tayinlandi. Bu haqda Zamin.uz xabar berdi.
Prezident matbuot xizmatining xabariga ko‘ra, mazkur lavozimga Abdulaziz Aqqulov tayinlandi. Avvalgi rahbar Umid Shodiyev boshqa ishga o‘tishi sababli o‘z vazifasidan ozod etilgan.
Hozircha uning kelgusi faoliyati haqida rasmiy ma’lumot berilmagan. Abdulaziz Aqqulov 1985 yilda Jizzax viloyatida tug‘ilgan.
U Toshkent davlat iqtisodiyot universitetini tamomlagan. Mehnat faoliyati davomida Turizm va sport vazirining o‘rinbosari, shuningdek, Turizmni rivojlantirish davlat qo‘mitasi raisining birinchi o‘rinbosari lavozimlarida ishlagan.
Yangi tayinlovga qadar esa O‘zbekistonning Birlashgan Arab Amirliklaridagi favqulodda va muxtor elchisi sifatida faoliyat yuritgan. Eslatib o‘tamiz, Turizm qo‘mitasi 2023 yil iyul oyida tashkil etilgan.
Uning birinchi rahbari sifatida Umid Shodiyev ishlagan.
