2026 yilda qo‘shimcha dam olish kunlari belgilandi
O‘zbekiston Prezidenti tomonidan 2026 yilda rasmiy sanalarni nishonlash munosabati bilan qo‘shimcha dam olish kunlari belgilandi. Bu haqda Zamin.uz xabar berdi.
Bu haqda 2025 yil 24 dekabr kuni imzolangan tegishli farmonda ma’lumot berilgan. Farmonga ko‘ra, Yangi yil bayrami munosabati bilan 31 dekabr, 2 va 3 yanvar qo‘shimcha dam olish kunlari sifatida belgilandi.
Shu tariqa, mamlakat aholisi Yangi yilni besh kun davomida nishonlash imkoniyatiga ega bo‘ladi. Bundan tashqari, 2026 yil davomida barcha xodimlar uchun 2 yanvar, 28–29 may va 31 avgust qo‘shimcha dam olish kunlari sifatida tasdiqlandi.
Olti kunlik ish haftasida ishlovchilar uchun esa 3 yanvar, 30 may va 31 dekabr qo‘shimcha dam olish kunlari etib belgilangan. Farmonda ayrim bayram kunlari dam olish kunlariga to‘g‘ri kelishi sababli ularni ko‘chirish tartibi ham ko‘rsatilgan.
Masalan, 8 mart bayrami uchun dam olish kuni 9 martga, 21 mart bayrami uchun 23 martga, 9 may bayrami uchun esa 11 mayga ko‘chiriladi. Besh kunlik ish haftasida ishlaydiganlar uchun esa 12 dekabr kuni dam olish 31 dekabrga ko‘chiriladi.
Dam olish kunlarining uzaytirilishi munosabati bilan turizm, sanatoriylar va ichki transport xizmatlarida chegirmalar va aksiyalarni tashkil etish tavsiya etilgan. Shuningdek, bayram tadbirlari haqida aholini keng xabardor qilish choralari ko‘riladi.
Manba: one.uz
