O‘zbekiston Respublikasi Ichki ishlar vazirligi avtomobillar harakatini kuzatish tizimi bilan bog‘liq tarqalgan ma’lumotlarga munosabat bildirdi. Bu haqda Zamin.uz xabar berdi.
Avvalroq ayrim manbalarda mazkur tizim orqali mamlakat bo‘ylab transport harakatini kuzatish mumkinligi haqida xabarlar tarqalgan edi. Biroq, vazirlik ushbu ma’lumotlarning asossiz ekanini ta’kidladi.
Ichki ishlar vazirligining bayonotida qayd etilishicha, ushbu tizimni Xitoyning Maxvision kompaniyasi taqdim etgan. Tizim tadbirkorlar tomonidan o‘rnatiladi va qoidabuzarliklar haqidagi ma’lumotlar yagona "Ma’muriy amaliyot" tizimiga uzatiladi.
Shu bilan birga, tizim kiberxavfsizlik bo‘yicha qat’iy tekshiruvlardan o‘tkaziladi. Fuqarolarning shaxsiy ma’lumotlari maxfiy saqlanadi va foto hamda videomateriallarda aks ettirilmaydi.
Jarimalar haqida ma’lumot olish uchun fuqarolar maxsus havolalar yoki rasmiy ilovalardan foydalanishlari mumkin. Ushbu tizimda faqatgina o‘sha fuqaroning o‘ziga tegishli bo‘lgan qoidabuzarliklar ko‘rsatiladi.
Ichki ishlar vazirligi tizimning xavfsizligi va himoyalanganligini ta’kidlab, barcha xavfsizlik talablariga rioya qilinishini ta’minlashini ma’lum qildi.
