2026 yilning 3 yanvar kuni Yer Quyoshga yil davomida eng yaqin masofada joylashadi. Bu haqda Zamin.uz xabar berdi.
Ushbu hodisa astronomiyada "perigeliy" deb ataladi. Moskva planetariysi bergan ma'lumotlarga ko‘ra, aynan shu kunda Quyosh Yerga nisbatan eng yaqin masofada bo‘ladi va shu sababli u yil davomida eng katta ko‘rinishda namoyon bo‘ladi.
Mutaxassislarning ta’kidlashicha, 3 yanvar kuni Yer va Quyosh o‘rtasidagi masofa taxminan 147 million 99 ming kilometrni tashkil etadi. Bu masofa tufayli Quyoshning ko‘rinish diametri yil davomida eng yuqori ko‘rsatkichga yetadi — 32 burchak daqiqasi va 35 soniyaga teng bo‘ladi.
Ushbu o‘zgarish oddiy ko‘z bilan deyarli sezilmasa-da, professional astronomik teleskoplar yoki maxsus suratlarda aniq ko‘rinadi. Shuningdek, astronomlar 2026 yilning iyul oyida teskari holat yuz berishini qayd etishdi.
Iyul oyida Yer Quyoshdan eng uzoq masofaga — afeliyga chiqadi. Shu sababli, iyulda Quyoshning ko‘rinish o‘lchami yanvardagidan ancha kichik bo‘ladi.
