O‘zbekiston Prezidenti Shavkat Mirziyoyev mamlakatning yangi investitsiya siyosati bo‘yicha ustuvor yo‘nalishlarni e’lon qildi. Bu haqda Zamin.uz xabar berdi.
Unga ko‘ra, 2026 yilga qadar O‘zbekiston 50 milliard dollar miqdorida xorijiy investitsiyalarni jalb qilishni rejalashtirmoqda. Ushbu mablag‘lar nafaqat loyihalarni moliyalashtirishga, balki ilg‘or texnologiyalarni joriy etish hamda yuqori qo‘shilgan qiymatga ega mahsulotlar ishlab chiqarishga yo‘naltirilishi kerakligi ta’kidlandi.
Davlat rahbari strategik investorlar uchun maxsus qo‘llab-quvvatlash choralarini ko‘rish rejalashtirilayotganini ma’lum qildi. Jumladan, investitsiya loyihalarini amalga oshirish uchun yer uchastkalari to‘g‘ridan-to‘g‘ri bozor qiymatida ajratiladi.
Shuningdek, yer toifasi o‘zgartirilganda, foydalanilmagan qism uchun to‘lovni bo‘lib-bo‘lib to‘lash imkoniyati yaratiladi. Jarayonlarni soddalashtirish maqsadida “yagona darcha” tamoyili asosida elektron platforma ishga tushiriladi.
Ushbu tizim orqali investorlar yer ajratish, yerning toifasini o‘zgartirish, qurilish ruxsatnomalari olish va infratuzilmaga ulanish masalalarini bir joydan hal qilish imkoniga ega bo‘ladilar. Bu orqali turli idoralarga murojaat qilish zaruriyati bartaraf etiladi.
Mazkur platformaga barcha tegishli vazirlik va idoralar ulanishi rejalashtirilgan. Manba: zamin.uz
