Navoiyda 320 mln dollarlik oltin loyihasi boshlanadi
Navoiy viloyatidagi oltin konlarida qiymati 320 million dollarga teng yangi loyiha ishga tushiriladi. Bu haqda Zamin.uz xabar berdi.
Ushbu loyiha ma’dan qazib olish va uni qayta ishlashni kengaytirishga qaratilgan. Bu haqda Prezident Shavkat Mirziyoyev 26 dekabr kuni Oliy Majlis va xalqiga qilgan murojaatida ma’lum qildi.
Loyiha doirasida qo‘shimcha 2 million tonna ma’dan qayta ishlanishi rejalashtirilgan. Shuningdek, Muruntov konini o‘zlashtirishning keyingi bosqichlari amalga oshiriladi.
Bundan tashqari, kumush konlarini rivojlantirish uchun qiymati 2 milliard 300 million dollarlik yirik investitsiya loyihalari amalga oshirilishi ko‘zda tutilgan. Natijada, yillik qayta ishlash quvvati 18 million tonnaga, oltin ishlab chiqarish hajmi esa 2030 yilgacha 175 tonnaga yetkaziladi.
Olmaliq kon-metallurgiya kombinatida ham yirik loyiha boshlanadi. Bu yerda qiymati 2 milliard 700 million dollarlik yangi metallurgiya majmuasi quriladi.
Mazkur majmua yiliga 300 ming tonna mis katodi ishlab chiqarish imkoniyatiga ega bo‘ladi. Shu bilan birga, “Samarqand kimyo” zavodida 381 million dollar miqdoridagi investitsiya hisobiga yiliga 370 ming tonna fosforli va 540 ming tonna murakkab o‘g‘it ishlab chiqarish yo‘lga qo‘yiladi.
Qashqadaryo viloyatida esa 200 million dollarlik kimyo zavodi qurilishi rejalashtirilgan. Ushbu korxona yiliga 50 ming tonna alkilbenzol mahsulotini ishlab chiqarib, maishiy kimyo, polimer va sintetik yoqilg‘i tayyorlashga xizmat qiladi.
Umuman olganda, 2026 yilga kelib kimyo sanoatida 4,5 milliard dollarlik, tog‘-kon metallurgiya, neft-gaz, avtomobilsozlik, to‘qimachilik va qurilish materiallari sohalarida 3 milliard dollardan ortiq, elektrotexnika tarmog‘ida 2 milliard dollarlik, farmatsevtika yo‘nalishida esa 800 million dollarlik yangi loyihalar amalga oshirilishi rejalashtirilgan. Shuningdek, 2024 yilda mamlakat eksportini 40 milliard dollarga yetkazish va tayyor hamda yarim tayyor mahsulotlar ulushini 55 foizdan oshirish maqsad qilib belgilangan.
