O‘zbekiston Respublikasi Prezidenti Shavkat Mirziyoyev 26-dekabr kuni Oliy Majlis va xalq oldida qilgan murojaatnomasida 2026-yilni “Mahallani rivojlantirish va jamiyatni yuksaltirish yili” deb e’lon qildi. Bu haqda Zamin.uz xabar berdi.
Ushbu qaror mahallalar faoliyatini kuchaytirish, fuqarolarni jamiyat hayotida faol ishtirok etishga rag‘batlantirish va mamlakatda tinchlik hamda hamjihatlikni mustahkamlashga qaratilgan. Prezidentning ta’kidlashicha, mahalla tizimi jamiyatning mustahkam poydevori hisoblanadi.
“Mahalla tinch va ahil bo‘lsa, jamiyatimiz ham tinch va hamjihat bo‘ladi. Mahalla rivojlansa, butun mamlakatimiz yuksaladi”, – dedi davlat rahbari.
Shu sababli mahalla institutlari ijtimoiy barqarorlikni ta’minlash, mehr-oqibat va adolatni targ‘ib qilishda muhim o‘rin egallaydi. Yangi yil uchun alohida davlat dasturi ishlab chiqiladi.
Ushbu dastur doirasida mamlakatdagi 9 mingdan ortiq mahalla faoliyatini rivojlantirish, ularni mehr-oqibat, hamjihatlik va tarbiya maskanlariga aylantirish bo‘yicha konkret chora-tadbirlar amalga oshiriladi. Prezident barcha davlat idoralari, mahalla raislari, nuroniylar, yoshlar, tadbirkorlar va fuqarolarni birgalikda belgilangan maqsadlarga erishishga chaqirdi.
Yil davomida amalga oshiriladigan tadbirlar va loyihalar rasmiy axborot resurslari orqali muntazam yoritib borilishi ta’kidlandi. Manba: One.uz.
