2026 yilda O‘zbekistonda ekologik loyihalarni moliyalashtirish uchun 1,9 trillion so‘m ajratilishi rejalashtirilmoqda. Bu haqda Zamin.uz xabar berdi.
Bu haqda Prezident Shavkat Mirziyoyev o‘zining parlament va xalq oldidagi murojaatida ma’lum qilgan. Ushbu mablag‘lar yashil hududlarni tashkil etish, chang va qum bo‘ronlariga qarshi kurashish hamda ekotizimni yaxshilashga yo‘naltiriladi.
Surxondaryo viloyatida 10 ming gektarlik "yashil belbog‘", Sirdaryo viloyatida esa 84 kilometr uzunlikdagi "yashil devor" barpo etilishi ko‘zda tutilgan. Qoraqalpog‘iston, Xorazm, Buxoro va Navoiy viloyatlarida umumiy maydoni 250 ming gektar bo‘lgan hududlar, jumladan, Orol dengizining qurigan qismida 115 ming gektar yer ko‘kalamzorlashtiriladi.
Shuningdek, barcha hududlarda botanika bog‘lari, dendrariylar va kamida 20 ta soyali yo‘lak tashkil etish rejalashtirilgan. 2026 yildan boshlab "yashil" texnikumlar faoliyat boshlaydi.
Har yili ularda 10 ming nafar mutaxassis dual ta’lim asosida tayyorlanadi. Bundan tashqari, Markaziy Osiyo Yashil universitetining faoliyati kengaytiriladi.
Havo, suv va tuproq sifatini baholash laboratoriyalari tashkil etilishi, shaharlarning tabiiy shamollatish tizimini kuchaytirishga doir tadqiqotlar o‘tkazilishi ham rejalashtirilgan. Bu loyihalar mamlakatning ekologik barqarorligini ta’minlashga qaratilgan.
Ma’lumot: zamin.uz.
