Toshkent shahri va Toshkent viloyatida ko‘mir bilan isitiladigan, ammo filtrsiz ishlayotgan issiqxonalar yopiladi va poytaxt hududidan ko‘chiriladi. Bu haqda Zamin.uz xabar berdi.
Bu haqda prezident Shavkat Mirziyoyev Oliy Majlis va O‘zbekiston xalqiga qilgan yillik murojaatida ma’lum qildi. Ushbu qaror mamlakatdagi ekologik muvozanatni yaxshilash va atrof-muhitni himoya qilishga qaratilgan choralarning bir qismi sifatida qabul qilindi.
Davlat rahbari o‘z nutqida yashil energetika, suv resurslaridan oqilona foydalanish va ekologik muvozanatni ta’minlashni asosiy ustuvor yo‘nalishlar sifatida belgiladi. Rasmiy ma’lumotlarga ko‘ra, Toshkent shahri va viloyatida hozirda ikki mingga yaqin issiqxona faoliyat yuritmoqda.
Ularning aksariyati ko‘mir va gazdan foydalanadi, biroq ko‘pchiligi filtrsiz ishlayotgan qozonxonalarga ega. Ayniqsa, kuz-qish mavsumida bu holat havoning sifati va ekologik holatga jiddiy zarar yetkazmoqda.
Shu sababli, filtrsiz qozonxonalardan foydalanish butunlay to‘xtatiladi. Issiqxonalar poytaxt hududidan chiqariladi va ularning isitish tizimi markazlashgan qozonxonalar orqali tashkil etiladi.
Bundan tashqari, issiqxona xo‘jaliklarini joylashtirish uchun 200 gektardan ortiq maydonda yangi agroklasterlar tashkil etiladi. Ushbu klasterlarga qo‘shilishni istagan issiqxonalar uchun subsidiya ajratilishi rejalashtirilgan.
Shuningdek, yirik korxonalar uchun 100 million dollar miqdorida kredit liniyasi ochiladi. Ushbu mablag‘lar filtrlar, tozalash inshootlari va zararli moddalar chiqindilarini nazorat qilish stansiyalarini o‘rnatishga yo‘naltiriladi.
Avvalroq, Toshkent tumanida 10 ta issiqxonaning ko‘mir tutuni havoni ifloslantirgani aniqlangach, ushbu xo‘jaliklar faoliyati darhol to‘xtatilgan edi. Bu kabi qat’iy choralar ekologik muammolarni hal etishga qaratilgan.
