Prezident ekologiyani yaxshilash bo‘yicha yangi chora-tadbirlarni e’lon qildi
2025-yil 26-dekabr kuni O‘zbekiston Prezidenti Shavkat Mirziyoyev parlament va xalqiga murojaat qilar ekan, ekologik talablarni kuchaytirish bo‘yicha bir qator muhim chora-tadbirlarni e’lon qildi. Bu haqda Zamin.uz xabar berdi.
Jumladan, zararli gaz chiqindilari yuqori bo‘lgan avtomobillarning Toshkent va viloyat markazlariga kirishini cheklash rejalashtirilmoqda. Ushbu maqsadda xalqaro tajriba asosida ekologik stikerlar joriy etiladi.
Davlat eski avtomobil egalari uchun qo‘llab-quvvatlash choralarini ko‘rishni rejalashtirgan. Bu doirada maxsus fond tashkil qilinadi va avtomobilini yangilashga qaror qilgan fuqarolarga kredit foizlarining bir qismini qoplash imkoniyati yaratiladi.
Shuningdek, avtomobillarga filtr o‘rnatib, zararli chiqindilarni kamaytirgan haydovchilarga ham xarajatlarning bir qismi qoplanadi. Prezident davlat transport tizimini rivojlantirishni ustuvor vazifa sifatida belgiladi.
Shahar ko‘chalarida avtobus va taksilar uchun ajratilgan maxsus yo‘laklar soni oshiriladi. Toshkent, Samarqand va Namanganda yo‘l harakatini samarali boshqarish uchun zamonaviy aqlli svetoforlar o‘rnatiladi.
Shavkat Mirziyoyev mamlakatda yashil avtomobillarni qo‘llab-quvvatlash bo‘yicha besh yillik dastur ishlab chiqilganini ta’kidladi. Ushbu dastur doirasida mahalliy ishlab chiqarilgan elektromobillar uchun 12 foizlik, xorijiy elektromobillar uchun esa 16 foizlik chegirmalar asosida avtokreditlar taqdim etiladi.
Tadbirkorlar uchun quvvatlash stansiyalarini qurishga 10 foizlik imtiyozli kreditlar ajratilishi ko‘zda tutilgan. Bundan tashqari, bu kabi obyektlar uchun yer uchastkalari bozor narxidan ikki baravar arzon narxlarda sotiladi.
Quvvatlash stansiyalari uchun elektr energiyasi narxi 1 kVt·soat uchun 300 so‘mdan oshgan taqdirda, ortiqcha qismi davlat tomonidan qoplanadi. Bu chora-tadbirlar ekologik muhitni yaxshilash va yashil transport vositalarini targ‘ib qilishga qaratilgan.
Manba: zamin.uz.
