Prezident korrupsiyaga qarshi yangi tizim joriy qiladi
O‘zbekiston Prezidenti Shavkat Mirziyoyev korrupsiyaga qarshi kurashni yanada kuchaytirish maqsadida favqulodda choralar ko‘rishni e’lon qildi. Bu haqda Zamin.uz xabar berdi.
U davlat byudjeti mablag‘larining sarflanishini qat’iy nazorat qilish, mansabdor shaxslarning daxlsizlik maqomini bekor qilish va korrupsiyaga qarshi yangi tizim joriy etilishini ta’kidladi. Prezidentning so‘zlariga ko‘ra, barcha davlat idoralarida komplayens va ichki nazorat ishlari uchun javobgar bo‘lgan rahbar o‘rinbosari lavozimi tashkil etiladi.
Ushbu rahbarlar Hisob palatasi vakillari bilan birgalikda to‘g‘ridan-to‘g‘ri Prezidentga bo‘ysunadi. Mazkur mexanizmning asosiy maqsadi o‘g‘rilik, mansab vakolatlarini suiiste’mol qilish va nopok xodimlarni aniqlashdir.
Shavkat Mirziyoyev davlat mablag‘larining har bir so‘mi uchun shaxsiy javobgarlik joriy etilishini alohida ta’kidladi. U lavozim yoki unvon hech kimga daxlsizlik kafolati bermasligini ta’kidlab, barcha idoralar nazorat ostida bo‘lishini ma’lum qildi.
Prezidentning aytishicha, komplayens xizmatlarining faoliyatiga to‘siq yaratgan har qanday shaxs korrupsiyada ishtirok etgan hisoblanadi. Mazkur choralar ijrosi Prezident Administratsiyasi huzuridagi komplayens xizmati tomonidan nazorat qilinadi.
Ushbu xizmat barcha poraxo‘rlik holatlari haqida davlat rahbariga darhol xabar beradi va bu masalalarda shaxsning lavozimi yoki avvalgi xizmatlari e’tiborga olinmaydi. Manba: one.uz.
