O‘zbekistonda turizm eksporti 20 milliard dollarga yetkaziladi
O‘zbekiston kelgusi besh yil ichida turizm sohasini jadal rivojlantirishni rejalashtirmoqda. Bu haqda Zamin.uz xabar berdi.
Xususan, turizm xizmatlari eksporti hajmini 20 milliard dollarga yetkazish maqsad qilingan. Bu haqda Prezident Shavkat Mirziyoyev o‘z murojaatida ma’lum qildi.
Mazkur maqsadga erishish uchun Samarqand shahrida keng qamrovli infratuzilma loyihalari amalga oshiriladi. Bibixonim masjidi, Registon maydoni, Amir Temur maqbarasi, Ulug‘bek rasadxonasi, Shohi-Zinda majmuasi va Afrosiyob muzeyi yagona turistik hudud sifatida birlashtiriladi.
Shuningdek, Shahrisabzda "Gelon" nomli yirik turizm majmuasining birinchi bosqichi ishga tushiriladi. Pop tumanida esa "Arashan" tog‘ kurort-turizm zonasi tashkil etilishi rejalashtirilgan.
Xorazm viloyatidagi Ichon-qal’a shaharchasi zamonaviy "aqlli" muzeyga aylantiriladi. Bundan tashqari, Qoraqalpog‘iston va Xorazm hududlarida arxeologik yodgorliklar atrofida yirik turistik yo‘nalishlar yaratiladi.
Bu loyihalar xorijiy sayyohlarni jalb etishga va ularning O‘zbekistonda qolish muddatini uzaytirishga xizmat qiladi. Turizm sohasini rivojlantirish uchun 85 trillion so‘m kredit mablag‘lari va 9 trillion so‘m subsidiya ajratilishi rejalashtirilgan.
Shuningdek, ta’lim xizmatlarini qo‘llab-quvvatlash maqsadida davlat budjetidan 7 trillion so‘m mablag‘ ajratiladi. Manba: zamin.uz
