Samarqand aeroporti yil davomida 1,5 mln yo‘lovchiga xizmat qildi
26-dekabr kuni Samarqand xalqaro aeroporti yil yakunlari bo‘yicha 1,5 millioninchi yo‘lovchini qabul qildi va 2025-yil uchun rekord natijani qayd etdi. Bu haqda Zamin.uz xabar berdi.
Bu haqda Air Marakanda matbuot xizmati xabar berdi. 1,5 millioninchi yo‘lovchi Samarqand viloyati Oqdaryo tumanida yashovchi Muhabbat Shodierova bo‘ldi.
U «Pobeda» aviakompaniyasining Samarqand – Moskva yo‘nalishidagi reysi orqali uchgan. Tadbir doirasida mazkur reys yo‘lovchilari o‘rtasida «Pobeda» va Air Marakanda tomonidan sovg‘alar o‘ynab berildi.
Eslatib o‘tamiz, oktyabr oyining oxiridan boshlab Samarqand aeroporti kuz-qish parvozlar mavsumiga o‘tdi. Yilning bahor-yoz mavsumida aeroport 900 mingdan ortiq yo‘lovchiga xizmat ko‘rsatib, o‘sishni 7 foiz darajada ta’minladi.
Shuningdek, o‘tgan mavsumda aeroport yo‘nalishlar tarmog‘i kengaytirildi. Ural Airlines aviakompaniyasi Krasnoyarskga, Azimuth Airlines esa Samara va Krasnodarga reyslarni yo‘lga qo‘ydi.
Bundan tashqari, AZAL Airlines Bokuga, Qazaq Air Astana yo‘nalishiga (Turkiston orqali), China Southern Airlines esa Urumchiga to‘g‘ridan-to‘g‘ri parvozlarni qayta tikladi. Manba: Air Marakanda matbuot xizmati.
