O‘zbekistonda faoliyat yuritayotgan Xitoy fuqarolari tomonidan sodir etilgan tartibsizliklarga huquqiy baho berildi. Bu haqda Zamin.uz xabar berdi.
Ijtimoiy tarmoqlarda tarqalgan videolavhada xorijliklar milliy valyutamiz – o‘zbek so‘mini yoqib, undan tamaki tutatish maqsadida foydalangani ko‘rsatilgan edi. Ushbu holat keng jamoatchilik orasida norozilik uyg‘otdi.
Mazkur voqea yuzasidan o‘tkazilgan surishtiruv ishlari natijasida qonunbuzarlar o‘z qilmishlari uchun xalq oldida uzr so‘rashga majbur qilindi. Shu bilan birga, ularga nisbatan jiddiy moliyaviy jazo chorasi qo‘llanildi.
Har bir huquqbuzarga BHMning 100 baravari miqdorida jarima belgilandi. Bu esa, har bir shaxs uchun 41 million so‘mni tashkil qiladi.
Milliy valyutamizga nisbatan hurmatsizlik qilish holati faqat ma’naviy emas, balki moliyaviy mas’uliyat bilan ham qoplanishi kerakligi yana bir bor ta’kidlandi. Ushbu voqea O‘zbekiston hududida bo‘lib turgan har bir shaxs mamlakat qonunlariga rioya qilishi va milliy qadriyatlarni hurmat qilishi shart ekanligini eslatib o‘tdi.
Yurtimizda qonun ustuvorligi va jazoning muqarrarligi ta’minlanmoqda. Ma’lumot manbasi: zamin.uz.
