O‘zbekistonda yaqin qarindoshlar nikohi taqiqlanadi
O‘zbekistonda qarindoshlar o‘rtasidagi nikohlar butunlay taqiqlanishi kutilmoqda. Bu haqda Zamin.uz xabar berdi.
Mamlakatda oila qonunchiligiga sezilarli o‘zgartirishlar kiritish rejalashtirilgan. Yangi qonun loyihasiga ko‘ra, yaqin qarindoshlar o‘rtasidagi nikoh munosabatlariga chek qo‘yiladi.
Bu taqiq nafaqat bevosita qarindoshlarga, balki yon shajara bo‘yicha ham qarindoshlik rishtalari mavjud shaxslarga nisbatan qo‘llaniladi. Qonun loyihasida 2-, 3- va 4-darajadagi qarindoshlar o‘rtasidagi nikohlar taqiqlanishi belgilangan.
Jumladan, tog‘a, amaki, amma va xolalar hamda ularning jiyanlari, shuningdek, tog‘avachcha, amakivachcha, ammavachcha va xolavachchalarning oila qurishi man etiladi. Ammo alohida istisno sifatida, agar farzandlikka olingan yoki o‘gay aka-singillar o‘rtasida qon-qarindoshlik bo‘lmasa, bu cheklovlar ularga tatbiq etilmaydi.
Shu bilan birga, nikoh yoshi bo‘yicha ham aniq qoidalar belgilanyapti. Faqatgina homiladorlik yoki farzand tug‘ilishi kabi alohida holatlarda tuman yoki shahar hokimi nikoh yoshini bir yilga pasaytirish vakolatiga ega bo‘ladi.
Biroq, nikoh yoshiga yetmagan shaxs bilan oilaviy munosabatda bo‘lish qattiq moliyaviy va huquqiy javobgarlikka sabab bo‘ladi. Bunda jarima miqdori 20,6 million so‘mdan 41,2 million so‘mgacha bo‘lishi, jamoat ishlari 240 soatdan 300 soatgacha davom etishi yoki axloq tuzatish ishlari 2 yilgacha tayinlanishi mumkin.
Manba: Zamin.uz
