O‘zgidromet xizmati 29–31 dekabr va 1 yanvar kunlari uchun ob-havo prognozini e’lon qildi. Bu haqda Zamin.uz xabar berdi.
Unga ko‘ra, O‘zbekiston bo‘ylab Yangi yil bayrami turli ob-havo sharoitida o‘tishi kutilmoqda. Ba’zi hududlarda yomg‘ir va qor yog‘ishi ehtimoli bor, ayrim joylarda esa iliq va quruq ob-havo kuzatiladi.
Qoraqalpog‘iston Respublikasi va Xorazm viloyatida havo o‘zgaruvchan bo‘lib, 29 dekabrda ayrim joylarda yengil yomg‘ir yog‘ishi mumkin. 30 dekabr kuni ba’zi hududlarda yomg‘ir va qor aralash yog‘adi.
31 dekabr hamda 1 yanvarda yog‘ingarchilik kutilmaydi, lekin tuman tushishi ehtimoli bor. Shamol tezligi 7–12 m/s bo‘lib, ayrim joylarda yo‘nalishini o‘zgartiradi.
Harorat kechalari 2 daraja sovuqdan 3 daraja iliqqacha, kunduzi esa 3–10 daraja iliq bo‘ladi. Buxoro va Navoiy viloyatlarida 29–31 dekabr kunlari ayrim joylarda yomg‘ir yog‘ishi mumkin.
1 yanvar kuni esa havo quruq bo‘ladi. Ayrim hududlarda tuman kuzatiladi.
Shamol 7–12 m/s tezlikda esib, ba’zi kunlarda 18 m/s gacha kuchayadi. Harorat dastlab 13–18 daraja iliq bo‘lsa, Yangi yil kunlari 7–12 daraja iliqqacha pasayadi.
Toshkent, Samarqand, Jizzax va Sirdaryo viloyatlarida 29 dekabr va 1 yanvar kunlari yog‘ingarchilik kutilmaydi. 30–31 dekabr kunlari esa ayrim hududlarda yomg‘ir yog‘ishi mumkin.
Tuman tushishi ehtimoli bor. Harorat dastlab 13–18 daraja iliq bo‘lsa, 1 yanvarda 5–10 daraja iliq atrofida bo‘ladi.
Qashqadaryo va Surxondaryo viloyatlarida 29 dekabr va 1 yanvar kunlari havo quruq bo‘lib, 30–31 dekabrda ayrim joylarda yomg‘ir yog‘ishi mumkin. Harorat asta-sekin pasayib, 14–19 daraja iliqdan 7–12 daraja iliqqacha tushadi.
Andijon, Namangan va Farg‘ona viloyatlarida havo o‘zgaruvchan bo‘lib, 30–31 dekabrda ayrim joylarda yomg‘ir yog‘ishi mumkin. Harorat 10–15 daraja iliqdan 3–8 daraja iliqqacha tushishi mumkin.
Tog‘li hududlarda esa havo sovuq bo‘ladi. Vaqti-vaqti bilan qor yog‘adi, tuman tushishi va yo‘llarda muzlash kuzatiladi.
Harorat kechalari 7 daraja sovuqqacha pasayib, kunduzi 0–5 daraja iliq atrofida bo‘ladi. Manba: O‘zgidromet.
