Voyaga yetmaganlar bilan nikohga taqiq kuchaytiriladi
O‘zbekistonda voyaga yetmagan shaxslar bilan nikoh tuzish va qarindoshlar o‘rtasidagi nikohlarni cheklash maqsadida yangi qonun loyihasi muhokamaga qo‘yildi. Bu haqda Zamin.uz xabar berdi.
Ushbu loyiha xotin-qizlar va bolalar huquqlarini himoya qilishga qaratilgan. Qonun loyihasiga ko‘ra, qarindoshlar, ya’ni tog‘a, amaki, amma, xola va ularning jiyanlari, shuningdek tog‘avachcha, amakivachcha, ammavachcha va xolavachchalar o‘rtasida nikoh tuzish taqiqlanadi.
Ammo bu taqiq farzandlikka olingan yoki o‘gay bolalar uchun qo‘llanilmaydi. Shuningdek, homiladorlik yoki bola tug‘ilishi kabi holatlarda nikoh yoshi tuman yoki shahar hokimi tomonidan bir yilga qisqartirilishi mumkinligi belgilangan.
Voyaga yetmagan shaxs bilan nikoh tuzganlarga nisbatan jazo choralari keskin kuchaytiriladi. Yangi tartibga ko‘ra, bunday holat uchun jarima miqdori 20 million 600 ming so‘mdan 41 million 200 ming so‘mgacha oshirilishi yoki 240–300 soat majburiy jamoat ishlari belgilanishi mumkin.
Shuningdek, ikki yilgacha axloq tuzatish ishlari ham qo‘llanilishi mumkin. Amaldagi qonunchilikda esa jarima miqdori 8 million 240 ming so‘mdan 12 million 360 ming so‘mgacha, jamoat ishlari esa 240 soatgacha edi.
Mazkur o‘zgarishlar bolalar va xotin-qizlar huquqlarini yanada samarali himoya qilishga qaratilgan. Manba: One.uz.
