O‘zbekistonda real ish haqi 9,1 foizga oshdi
O‘zbekiston Markaziy banki 2025 yilning uchinchi choragi bo‘yicha mehnat bozori va iqtisodiy holat haqidagi hisobotni taqdim etdi. Bu haqda Zamin.uz xabar berdi.
Ushbu davrda aholining daromadlari va ish bilan bandlik darajasi ijobiy o‘sishda davom etgani qayd etildi. Joriy yilning uchinchi choragida nominal ish haqi o‘rtacha 19,2 foizga oshgan.
Inflyatsiya ta’siridan tozalangan holda, fuqarolarning real daromadlarida 9,1 foizlik o‘sish kuzatilgan. Bugungi kunda mamlakat bo‘yicha o‘rtacha oylik ish haqi miqdori 6,2 million so‘mni tashkil qilmoqda.
Eng yuqori maosh to‘lanadigan sohalar moliya, sug‘urta va axborot-kommunikatsiya texnologiyalari (AKT) tarmoqlaridir. Hududlar kesimida ish haqi o‘sishi bo‘yicha eng yuqori ko‘rsatkichlar Samarqand (14,6 foiz), Sirdaryo (11,1 foiz) va Namangan (10,9 foiz) viloyatlarida qayd etilgan.
Shuningdek, O‘zbekistondagi real ish haqi o‘sishi qo‘shni Markaziy Osiyo mamlakatlaridagi ko‘rsatkichlardan sezilarli darajada yuqori ekani ta’kidlanmoqda. Milliy valyutaning barqarorligi tufayli eng kam ish haqi dollar hisobida 103 dollarga yetgan.
Mehnat bozorida vakansiyalar soni ham 3,3 foizga oshgan. Ayni paytda savdo, umumiy ovqatlanish va sanoat sohalarida xodimlarga talab yuqori bo‘lib qolmoqda.
