O‘zbekistonda Fanlar akademiyasi Jamg‘armasi tashkil etiladi
O‘zbekistonda 2026 yil 1 yanvardan boshlab Fanlar akademiyasi Jamg‘armasi faoliyatini boshlaydi. Bu haqda Zamin.uz xabar berdi.
Ushbu tuzilma ilm-fan sohasini moliyaviy qo‘llab-quvvatlashning asosiy mexanizmi sifatida tashkil etilmoqda. Bu orqali olimlarning ilmiy g‘oyalarini amaliy loyihalarga aylantirish uchun zarur resurslar bilan ta’minlanishi kutilmoqda.
Bu haqda podrobno.uz xabar bermoqda. Mazkur jamg‘arma davlat rahbari qarori asosida Fanlar akademiyasining faoliyatini modernizatsiya qilish maqsadida tashkil etilgan.
Rejalarga ko‘ra, yangi ilmiy ishlanmalar soni va ulardan olinadigan daromadni uch barobarga oshirish ko‘zda tutilgan. Bundan tashqari, yosh tadqiqotchilarning ilm-fandagi ulushi 60 foizga yetkazilishi rejalashtirilgan.
Ilm-fan va sanoat o‘rtasidagi integratsiya chuqurlashtirilib, xalqaro hamkorlik doirasi ham kengaytiriladi. Hujjatda strategik ahamiyatga ega bo‘lgan tadqiqotlar va innovatsion tashabbuslarni qo‘llab-quvvatlashga alohida e’tibor qaratilgan.
Shuningdek, yosh olimlar uchun barqaror moliyaviy ta’minotni yo‘lga qo‘yish masalasi ham ko‘zda tutilgan. Ushbu chora-tadbirlar xorijdagi o‘zbek olimlarini vatanga qaytarish va milliy ilm-fan rivojiga jalb qilishga xizmat qilishi kutilmoqda.
Bundan tashqari, Fanlar akademiyasi infratuzilmasini kengaytirish rejalari ham mavjud. Ilg‘or texnologiyalar markazi hamda Xalqaro molekulyar allergologiya markazi akademiya tizimiga o‘tkaziladi.
Namangan, Samarqand va Termiz shaharlarida akademiyaning hududiy bo‘limlari tashkil etiladi. Shuningdek, Markaziy Osiyoda Xalqaro fanlar kengashining mintaqaviy ofisi ochilishi rejalashtirilgan.
Milliy arxeologiya markazi esa Antropologiya institutiga aylantiriladi. Eslatib o‘tamiz, avvalroq Toshkent shahrida nazariy fiziklar uchun yangi ilmiy institut ochilishi haqida ham xabar berilgan edi.
