O‘zbekiston va Turkmaniston hamkorlikni rivojlantirishni muhokama qildi
29-dekabr kuni O‘zbekiston Respublikasi Prezidenti Shavkat Mirziyoyev va Turkmaniston Xalq Maslahati Raisi Gurbanguli Berdimuhamedov telefon orqali muloqot qildi. Bu haqda Zamin.uz xabar berdi.
Suhbat davomida tomonlar bir-birlarini Yangi yil bilan tabriklab, ikki davlat xalqlari uchun tinchlik, farovonlik va taraqqiyot tiladilar. Muloqot chog‘ida O‘zbekiston va Turkmaniston o‘rtasidagi do‘stlik, yaxshi qo‘shnichilik va strategik sheriklikni yanada rivojlantirish masalalari muhokama qilindi.
Tomonlar o‘zaro tovar ayirboshlash va yuk tashish hajmining ortib borayotganini, shuningdek, energetika, sanoat, qishloq xo‘jaligi, suv resurslari va transport sohalaridagi hamkorlikning kengayishini alohida qayd etdilar. Shuningdek, “Shovot-Toshhovuz” chegaraoldi savdo zonasining ishga tushirilgani hamda hududlararo, ishbilarmonlik va madaniy-gumanitar sohalardagi almashinuvlarning faollashgani ta’kidlandi.
Mintaqaviy hamkorlik masalalari yuzasidan ham fikr almashildi. Prezident Shavkat Mirziyoyev Turkmanistonda, xususan, Avazada o‘tkazilgan yirik xalqaro sammitlar va Ashxoboddagi forumlarning muvaffaqiyatli tashkil etilganini yuqori baholadi.
Shuningdek, kelgusi yilda xalqaro va mintaqaviy ahamiyatga ega tadbirlarni birgalikda o‘tkazish rejalari muhokama qilindi. Manba: one.uz
