O‘zbekiston Afg‘onistonga 390 tonna yordam yubordi
O‘zbekiston 2023-yil 29-dekabr kuni Afg‘onistonga 390 tonnalik gumanitar yordam yetkazdi. Bu haqda Zamin.uz xabar berdi.
Bu haqda mamlakat Tashqi ishlar vazirligi xabar berdi. Mazkur yordam yuklari tarkibida dori-darmon vositalari hamda oziq-ovqat mahsulotlari mavjud.
Yordamni topshirish marosimi Afg‘onistonning Hayraton shahrida bo‘lib o‘tdi. Tadbirda Balx viloyati rahbari Muhammad Yusuf Vafa ishtirok etdi va O‘zbekiston Prezidenti Shavkat Mirziyoyevga afg‘on xalqiga ko‘rsatilayotgan doimiy yordam uchun chuqur minnatdorlik bildirdi.
Shuningdek, Vafa so‘nggi yillarda O‘zbekiston bilan hamkorlikning rivojlanishi natijasida Afg‘oniston mahsulotlari eksporti oshgani va aholining ijtimoiy-iqtisodiy sharoitlari yaxshilanganini ta’kidladi. Tashqi ishlar vazirligi ma’lumotiga ko‘ra, joriy yil davomida O‘zbekiston qo‘shni Afg‘onistonga to‘rtinchi marta gumanitar yordam yuborgan.
Bu kabi harakatlar ikki davlat o‘rtasidagi do‘stlik va qo‘shnichilik munosabatlarini mustahkamlashga xizmat qilmoqda.
