Yangi yil kunlari ob-havo o‘zgaruvchan bo‘ladi
“O‘zgidromet” markazi 31 dekabrdan 3 yanvargacha bo‘lgan ob-havo ma’lumotlarini taqdim etdi. Bu haqda Zamin.uz xabar berdi.
Yangi yil bayrami kunlarida O‘zbekiston hududlarida havo asosan o‘zgaruvchan bo‘lib, ba’zi joylarda yog‘ingarchilik kuzatilishi mumkin. Qoraqalpog‘iston va Xorazm viloyatlarida 31 dekabr kechasi va erta tongda ayrim hududlarda yengil yomg‘ir yog‘ishi ehtimoli bor.
1–3 yanvar kunlari yog‘ingarchilik bo‘lmaydi, biroq tuman tushishi mumkin. Harorat kechalari 2 daraja sovuqdan 3 daraja iliqqacha, kunduzlari esa 0–8 daraja iliq bo‘lishi kutilmoqda.
Buxoro va Navoiy viloyatlarida 31 dekabr kechasi yomg‘ir yog‘ishi mumkin. 1 va 2 yanvar kunlari havo quruq bo‘ladi, 3 yanvar kuni esa ayrim joylarda yomg‘ir qorga aylanishi ehtimoli bor.
Kunduzi havo harorati 5–15 daraja iliq atrofida bo‘ladi. Toshkent, Samarqand, Jizzax va Sirdaryo viloyatlarida 31 dekabr kuni ba’zi hududlarda yomg‘ir yog‘adi.
1 va 2 yanvar kunlari yog‘ingarchilik bo‘lmaydi, 3 yanvar kuni esa ayrim joylarda yomg‘ir yoki qor yog‘ishi mumkin. Harorat kunduzi 3–13 daraja iliq bo‘ladi.
Qashqadaryo va Surxondaryo viloyatlarida Yangi yil kunlari nisbatan iliq ob-havo kuzatiladi. Ayrim kunlarda yomg‘ir yog‘ishi ehtimoli bor.
Kunduzi harorat 7–15 daraja iliq, kechalari esa 0–10 daraja iliq bo‘ladi. Farg‘ona vodiysi viloyatlarida 1 va 3 yanvar kunlari ba’zi joylarda yomg‘ir yog‘ishi mumkin.
Kunduzi havo harorati 3–10 daraja iliq atrofida bo‘lishi kutilmoqda. Tog‘li hududlarda vaqt-vaqti bilan yomg‘ir va qor yog‘adi.
Ba’zi joylarda yog‘ingarchilik kuchli bo‘lishi mumkin. Kechalari sovuq, kunduzlari esa 0–7 daraja iliq bo‘lishi kutilmoqda.
Mutaxassislar Yangi yil bayrami kunlari tuman va yog‘ingarchilik bo‘lishi mumkin bo‘lgan hududlarda ehtiyotkorlikka rioya qilishni tavsiya etmoqda. Manba: O‘zgidromet.
