Mirziyoyev va Putin strategik sheriklikni muhokama qildi
30-dekabr kuni O‘zbekiston Respublikasi Prezidenti Shavkat Mirziyoyev va Rossiya Federatsiyasi Prezidenti Vladimir Putin o‘rtasida telefon orqali muloqot bo‘lib o‘tdi. Bu haqda Zamin.uz xabar berdi.
Suhbat davomida ikki davlat rahbarlari o‘zaro munosabatlar va xalqaro vaziyat bo‘yicha fikr almashdilar. Muloqot avvalida Prezident Shavkat Mirziyoyev Rossiya rahbari qarorgohiga qilingan hujumga urinishni qat’iy qoraladi.
U bunday harakatlar mintaqaviy barqarorlik va xavfsizlikka jiddiy zarar yetkazishini, shuningdek, uzoq muddatli tinchlikka erishish yo‘lidagi sa’y-harakatlarga tahdid solishini ta’kidladi. Uchrashuvda O‘zbekiston va Rossiya o‘rtasidagi strategik sheriklik va ittifoqchilik munosabatlarini yanada mustahkamlash masalalari muhokama qilindi.
Oliy darajadagi kelishuvlarni hayotga tatbiq etish va hamkorlikni yangi bosqichga olib chiqish zarurligi qayd etildi. Shu bilan birga, tomonlar xalqaro va mintaqaviy ahamiyatga ega dolzarb masalalar, shuningdek, kelgusi qo‘shma tadbirlar rejasi haqida fikr almashdilar.
Muloqot yakunida ikki davlat yetakchilari bir-birini yaqinlashib kelayotgan 2026-yil bilan qutlab, mustahkam sog‘liq, baxt-saodat va farovonlik tiladilar. Shuningdek, O‘zbekiston va Rossiya xalqlariga tinchlik, osuda hayot hamda bardavom taraqqiyot istaklarini bildirdilar.
Ma’lumot manbasi: zamin.uz.
