Tog‘li hududlarda qor ko‘chishi xavfi e’lon qilindi
O‘zbekiston Respublikasi Gidrometeorologiya xizmati markazi ("O‘zgidromet") 2025 yil 31 dekabrdan 2026 yil 5 yanvargacha davom etadigan ob-havo sharoiti haqida tezkor ogohlantirish berdi. Bu haqda Zamin.uz xabar berdi.
Ushbu davrda kuzatiladigan yog‘ingarchilik va harorat o‘zgarishlari sababli respublikaning tog‘li hududlarida qor ko‘chishi xavfi mavjud. Mazkur ogohlantirishga ko‘ra, Qashqadaryo viloyatining Dehqonobod, Kitob, Qamashi va Shahrisabz tumanlari, Surxondaryo viloyatining Boysun, Qumqo‘rg‘on, Sariosiyo va Uzun tumanlari, Samarqand viloyatining Nurobod, Qo‘shrabot, Samarqand va Urgut tumanlari, Jizzax viloyatining Baxmal va Zomin tumanlari, Toshkent viloyatining Bo‘stonliq, Parkent va Ohangaron tumanlari (Chotqol tizmasi) hamda Namangan viloyatining Pop tumani xavfli hududlar sirasiga kiritilgan.
Mutaxassislar tog‘li hududlarda yashovchi aholini, dam olishga otlangan fuqarolarni va ushbu yo‘nalishlarda harakatlanadigan haydovchilarni ogoh bo‘lishga chaqirmoqda. Xavfsizlikni ta’minlash maqsadida ushbu hududlarda harakatni imkon qadar cheklash tavsiya etiladi.
