Yangi yil haftasida havo o‘zgaruvchan bo‘ladi
O‘zbekiston Respublikasi Gidrometeorologiya xizmati (O‘zgidromet) 31 dekabrdan 7 yanvargacha bo‘lgan davr uchun ob-havo prognozini e’lon qildi. Bu haqda Zamin.uz xabar berdi.
Unga ko‘ra, Yangi yil haftasida mamlakatning turli hududlarida havo o‘zgaruvchan bo‘ladi va ayrim kunlarda qisqa muddatli yog‘ingarchilik kuzatilishi mumkin. Qoraqalpog‘iston va Xorazm viloyatlarida 31 dekabr kechasi va ertalab ayrim joylarda yengil yomg‘ir yog‘ishi ehtimoli mavjud.
1–7 yanvar kunlari yog‘ingarchilik kutilmaydi, biroq ba’zi hududlarda tuman tushishi mumkin. Kechki harorat −8 darajagacha pasayib, kunduzlari 0–8 daraja iliq bo‘lishi taxmin qilinmoqda.
Buxoro va Navoiy viloyatlarida 31 dekabrda ayrim joylarda yomg‘ir yog‘ishi mumkin. 1–2 yanvar kunlari havo quruq bo‘lsa, 3 yanvarda yomg‘irning qorga aylanish ehtimoli bor.
Keyingi kunlarda yog‘ingarchilik kutilmaydi. Kunduzgi harorat 5–15 daraja iliqni tashkil etadi.
Toshkent, Samarqand, Jizzax va Sirdaryo viloyatlarida 31 dekabrda ayrim hududlarda yomg‘ir yog‘adi. 1–2 yanvar kunlari havo ochiq bo‘lib, 3 yanvarda ayrim joylarda yomg‘ir yoki qor yog‘ishi mumkin.
Hafta oxiriga borib kechalari harorat −3 darajagacha pasayib, kunduzlari 3–8 daraja iliq bo‘ladi. Qashqadaryo va Surxondaryo viloyatlarida Yangi yil haftasida havo iliq bo‘lib, faqat ayrim kunlarda yomg‘ir yog‘ishi mumkin.
Kunduzgi harorat 7–15 daraja iliq bo‘lishi prognoz qilinmoqda. Farg‘ona vodiysida yog‘ingarchilik deyarli kutilmaydi.
Faqat 1 va 3 yanvar kunlari ayrim joylarda yomg‘ir yog‘ishi ehtimoli bor. Kunduzgi harorat 3–10 daraja iliq bo‘ladi.
Tog‘li hududlarda 31 dekabrdan 3 yanvargacha yomg‘ir va qor yog‘ishi, ba’zi joylarda kuchayishi mumkin. Keyingi kunlarda havo quruq bo‘lib, kechalari harorat 5–10 daraja sovuq bo‘lishi kutilmoqda.
Mutaxassislar ushbu haftada tuman va sirpanchiq yo‘llar kuzatilishi mumkin bo‘lgan hududlarda ehtiyotkorlikka rioya qilishni tavsiya etmoqda.
