Prezident “Yangi O‘zbekiston” universiteti qurilishini ko‘zdan kechirdi
30-dekabr kuni Prezident Shavkat Mirziyoyev Yangi Toshkentda qurilayotgan “Yangi O‘zbekiston” universiteti va O‘zbekiston Milliy kutubxonasining yangi binosi qurilish jarayonlari bilan tanishdi. Bu haqda Zamin.uz xabar berdi.
Bu haqda podrobno.uz xabar berdi. Universitet majmuasi 50 gektar maydonda joylashadi va dastlabki qiymati 200 million dollar deb baholangan.
Loyiha turkiyalik mutaxassislar bilan hamkorlikda ishlab chiqilgan bo‘lib, qurilish ishlarini “O‘zg‘uv’en” kompaniyasi amalga oshirmoqda. Ushbu majmuada 10 ming nafar talaba o‘qishi mo‘ljallangan.
Unda beshta fakultet, rektorat, ming o‘ringa ega kutubxona, muzey, ko‘rgazma zali va multimedia xonalari joy oladi. Shuningdek, talabalar va o‘qituvchilar uchun ming o‘rinli sport inshooti, ikki ming o‘rinli turar joy, suzish havzasi va ovqatlanish maskanlari qurilishi rejalashtirilgan.
Universitet 2027-yildan talaba qabul qilishni boshlaydi. Bundan tashqari, Milliy kutubxonaning yangi binosi ham qariyb 4 gektar hududda barpo etilmoqda.
Binoning loyihasida milliy me’morchilik an’analari va zamonaviy yechimlar uyg‘unlashtirilgan. To‘rt qavatli inshootning umumiy maydoni 30 ming kvadrat metrni tashkil etadi va bir vaqtning o‘zida 1,5 ming kitobxonga xizmat ko‘rsatish imkoniyatiga ega bo‘ladi.
Kitoblarni saqlash, xavfsizlik va qayta ishlash uchun maxsus texnologik xonalar tashkil qilinadi. Kutubxona xalqaro va milliy elektron bazalarga onlayn kirish imkoniyatini ham ta’minlaydi.
Bundan tashqari, ko‘rishida nuqsoni bor fuqarolar uchun maxsus muhit yaratiladi. Kutubxona hududida 300 o‘rinli kafe, galereya, sport maydonchalari va dam olish joylari qurilishi ham ko‘zda tutilgan.
Shuningdek, Samarqandda 1911-yilda qurilgan tarixiy binoda joylashadigan Bolalar kutubxonasi konsepsiyasi ham taqdim etilgan edi. Ushbu bino Toshkentdagi kutubxona tajribasi asosida restavratsiya qilinib, tarixiy qiyofasi saqlanadi.
