O‘zbekistonda sanoat 2030-yilgacha 2,5 barobarga o‘sadi
O‘zbekistonning 2030-yilgacha bo‘lgan rivojlanish strategiyasi doirasida sanoatni jadallashtirish va iqtisodiyotni mustahkamlash asosiy maqsadlardan biri sifatida belgilangan. Bu haqda Zamin.uz xabar berdi.
Ushbu strategiya mahalliy xomashyo resurslaridan maksimal darajada foydalanish va ilg‘or texnologiyalarni joriy etish orqali iqtisodiyotning barqaror o‘sishiga erishishga qaratilgan. Hujjatda yuqori qo‘shilgan qiymatga ega mahsulotlar ishlab chiqarish hajmini oshirish, ayniqsa, yengil avtomobillar ishlab chiqarishni yiliga 1 million donaga yetkazish maqsadi belgilangan.
Bu esa sanoatda ishlab chiqarish zanjirlarini chuqurlashtirish, texnologik yangiliklarni joriy etish va raqobatbardosh mahsulotlar ulushini oshirishga qaratilgan keng ko‘lamli chora-tadbirlarni amalga oshirishni talab etadi. Shu orqali avtosanoat mamlakat iqtisodiyotida yetakchi tarmoqlardan biriga aylanishi kutilmoqda.
Loyihaga ko‘ra, sanoatda texnologik mahsulotlar ishlab chiqarish hajmini 2023-yilga nisbatan 2,5 barobarga oshirish rejalashtirilgan. Ushbu maqsadga erishish uchun mahalliy xomashyoni chuqur qayta ishlash, sanoat kooperatsiyasini kengaytirish va qo‘shimcha qiymatni mamlakat ichida shakllantirish kabi chora-tadbirlar amalga oshiriladi.
Bundan tashqari, yuqori daromad keltiruvchi tarmoqlar uchun resurs bazasini kengaytirish ham strategiyaning muhim yo‘nalishlaridan biridir. Xususan, 2030-yilgacha mis ishlab chiqarishni 2,5 barobar, oltinni 1,5 barobar, kumush va uranni esa 3 barobarga oshirish ko‘zda tutilgan.
Elektrotexnika sanoatida misni qayta ishlash hajmini 300 ming tonnagacha yetkazish ham rejalashtirilgan. Umuman olganda, ushbu rejalar sanoat tarmoqlarida yangi ishlab chiqarish quvvatlarini yaratish, ichki va tashqi bozorlarda raqobatbardosh mahsulotlarni ko‘paytirish, texnologiyalar transferi va kooperatsiyani tezlashtirishga xizmat qiladi.
Natijada sanoatning barqaror o‘sishini ta’minlaydigan mustahkam qiymat zanjirlari shakllantirilishi kutilmoqda. Manba: One.uz.
