O‘zbekistonda umr davomiyligi 2030 yilgacha 78 yoshga yetadi
O‘zbekiston 2030 yilgacha aholi salomatligini yaxshilash va umr davomiyligini oshirishni maqsad qilmoqda. Bu haqda Zamin.uz xabar berdi.
“O‘zbekiston – 2030” strategiyasi loyihasida o‘rtacha umr davomiyligini 78 yoshga yetkazish sog‘liqni saqlash sohasidagi ustuvor vazifalardan biri sifatida belgilangan. Bunga erishish uchun tibbiy xizmatlar sifatini bosqichma-bosqich yaxshilash, kasalliklarni erta aniqlash va samarali davolash tizimlarini kengaytirish rejalashtirilmoqda.
Strategiyaga ko‘ra, sog‘liqni saqlash tizimini moliyalashtirish barqaror ravishda oshiriladi. Jumladan, 2030 yilga qadar davlat byudjetidan tibbiyot sohasiga ajratiladigan mablag‘lar yalpi ichki mahsulotning 5 foizigacha yetkaziladi.
Bu esa tibbiy xizmatlardan foydalanish imkoniyatlarini kengaytirish va sohaning moddiy-texnika bazasini mustahkamlashga xizmat qiladi. Erta o‘lim holatlarini kamaytirish ham muhim yo‘nalishlardan biri hisoblanadi.
Xususan, 30–69 yoshdagi aholi orasida yurak-qon tomir kasalliklaridan kelib chiqadigan erta o‘limni 27 foizgacha, saraton kasalligi bilan bog‘liq erta o‘limni 5,2 foizgacha kamaytirish rejalashtirilgan. Shuningdek, qandli diabetga chalingan bemorlarni to‘liq qamrab olish, nafas yo‘llari kasalliklaridan erta o‘lim ko‘rsatkichini 1,5 foizdan oshirmaslik va sil kasalligi bilan bog‘liq holatlarni 33 foizdan yuqoriga chiqarmaslik maqsad qilingan.
Ushbu chora-tadbirlar aholi salomatligini mustahkamlash, kasalliklarni oldini olish va hayot sifatini yaxshilash orqali umr davomiyligini oshirishga qaratilgan. Ma’lumotlarga ko‘ra, 2024 yilda O‘zbekistonda o‘rtacha umr davomiyligi 75,1 yoshni tashkil etgan (manba: zamin.uz).
