2025 yilning 9 oyida 664 ming chaqaloq tug‘ildi
Milliy statistika qo‘mitasi tomonidan e’lon qilingan ma’lumotlarga ko‘ra, 2025 yilning yanvar–sentyabr oylarida O‘zbekistonda 664,6 ming nafar chaqaloq dunyoga kelgan. Bu haqda Zamin.uz xabar berdi.
Ushbu ko‘rsatkichlar tahlili shuni ko‘rsatadiki, tug‘ilishlar asosan yosh oilalar hissasiga to‘g‘ri kelmoqda. Otalarning yosh bo‘yicha taqsimotiga qaralsa, 25 yoshgacha bo‘lgan otalar soni 74 946 nafarni (11,3%) tashkil etgan.
Eng katta ulush 25–39 yoshdagi otalarga tegishli bo‘lib, ularning soni 542 512 nafarni (81,6%) tashkil qilgan. 40 yosh va undan katta bo‘lgan otalar esa 47 140 nafarni (7,1%) tashkil etgan.
Onalarning yosh taqsimotiga nazar tashlasak, 25 yoshgacha bo‘lgan onalar 269 823 nafarni (40,6%) tashkil etgan. 25–39 yosh oralig‘idagi onalar soni 385 424 nafarni (58%) tashkil qilgan bo‘lsa, 40 yosh va undan katta bo‘lgan onalar soni 9 351 nafarni (1,4%) tashkil etgan.
Ushbu ma’lumotlardan ko‘rinib turibdiki, asosan 25–39 yosh oralig‘idagi erkaklar va ayollar farzand ko‘rishda yetakchilik qilmoqda. Bu yosh davri oilaviy hayotning faol davri sifatida ko‘riladi.
Manba: Milliy statistika qo‘mitasi.
