O‘zbekiston Respublikasida korrupsiyaga qarshi kurashish va uning oldini olish mexanizmlarini takomillashtirish bo‘yicha yangi prezident farmoni qabul qilindi. Bu haqda Zamin.uz xabar berdi.
Ushbu hujjatga ko‘ra, sohaga zamonaviy raqamli yechimlar joriy etilib, nazorat jarayonlari yanada kuchaytiriladi. Farmon asosida 2026-yil 1-iyuldan boshlab “Raqamli komplayens” axborot dasturiy kompleksi sinov tariqasida ishga tushiriladi.
Ushbu platforma korrupsiyaga qarshi choralarni muvofiqlashtirish, ma’lumotlar almashuvini tezlashtirish va nazorat jarayonlarini raqamlashtirishga xizmat qiladi. Xususan, mazkur dastur korrupsiyaning oldini olish bo‘yicha klaster ishtirokchilari o‘rtasida tezkor axborot almashish imkoniyatini yaratadi.
Shuningdek, “E-Komplaens” moduli orqali davlat organlari va tashkilotlaridagi ichki nazorat bo‘linmalari faoliyati to‘liq raqamlashtiriladi. Farmon bilan Korrupsiyaga qarshi kurashish agentligining vakolatlari ham kengaytirildi.
Endilikda agentlik davlat idoralari va tashkilotlarining markaziy apparatlarida joylashgan ichki nazorat bo‘linmalariga qonunbuzilishlarni oldini olish bo‘yicha majburiy ko‘rsatmalar va taqdimnomalar kiritish huquqiga ega bo‘ladi. Shuningdek, korrupsiyaviy holatlar haqida xabar bergan fuqarolarni himoya qilish masalasi ham ko‘zda tutilgan.
Ularni ish joyida tazyiq va ta’qibdan asrash uchun maxsus himoya orderlari joriy qilinadi. Bunga qo‘shimcha ravishda, korrupsiyaga qarshi kurashda faol ishtirok etgan fuqarolarni rag‘batlantirish maqsadida “Korrupsiyaga qarshi kurashishga qo‘shgan hissasi uchun” nomli ko‘krak nishoni ta’sis etiladi.
Ushbu chora-tadbirlar korrupsiyaga qarshi kurashda ochiqlikni ta’minlash, samaradorlikni oshirish hamda jamoatchilik ishtirokini kuchaytirishga xizmat qilishi kutilmoqda. Manba: One.uz
