Taksi haydovchilari uchun soliq stavkasi 1% bo‘ladi
2026 yil 1 yanvardan boshlab O‘zbekistonda o‘zini o‘zi band qilgan taksi haydovchilari uchun soliq tizimi soddalashtiriladi. Bu haqda Zamin.uz xabar berdi.
Yangi tartibga ko‘ra, ular uchun aylanmadan olinadigan soliq stavkasi 1 foiz qilib belgilangan. Bu esa haydovchilar uchun soliq to‘lash jarayonini osonlashtiradi.
Soliq miqdori haydovchining real daromadiga qarab hisoblanadi. Misol uchun, agar haydovchi bir oyda 2 million so‘m daromad qilsa, u faqat 20 ming so‘m soliq to‘laydi.
Bunda yo‘lovchilar onlayn taksi platformalari orqali tashilgan bo‘lsa, soliq avtomatik tarzda ushlab qolinadi. Onlayn agregator platformasi haydovchining daromadidan 1 foizni ushlab qolib, to‘g‘ridan to‘g‘ri davlat byudjetiga o‘tkazadi.
Ammo agregatorlardan tashqarida amalga oshirilgan xizmatlar uchun soliq avtomatik hisoblanmaydi. Shuningdek, 2026 yildan boshlab o‘zini o‘zi band qilgan shaxslar va yakka tartibdagi tadbirkorlar uchun elektron to‘lovlarni qabul qilish maqsadida QR-koddan foydalanish majburiy etiladi.
Lekin taksi haydovchilari uchun bu talab istisno tarzida qo‘llanilmaydi. 2025 yil 12 avgustdagi 247-sonli qarorga muvofiq, soliq organlarining axborot tizimlari bilan bog‘langan onlayn agregatorlar orqali xizmat ko‘rsatuvchi haydovchilar va kurerlar uchun alohida QR-kod o‘rnatish talab qilinmaydi.
Mazkur o‘zgarishlar haydovchilar faoliyatini yengillashtirish va soliq tizimini soddalashtirishga qaratilgan. Manba: One.uz.
