“O‘zgidromet” yanvar oyining dastlabki kunlari bo‘yicha havo harorati va ob-havo sharoitlari haqida ma’lumot berdi. Bu haqda Zamin.uz xabar berdi.
Mutaxassislarning ta’kidlashicha, yanvar O‘zbekistonda qishning eng sovuq oyi hisoblanadi. Ammo bu oy davomida doimiy keskin sovuq kuzatilishi kamdan-kam hollarda uchraydi.
So‘nggi yillarda global iqlim o‘zgarishlari ta’sirida yanvar oylarining aksariyati me’yordan iliqroq kechayotgani qayd etilgan. Masalan, 2016, 2019, 2022 va 2024 yillarda havo harorati odatdagidan sezilarli darajada yuqori bo‘lgan.
2026 yilning yanvar oyida ham shunga o‘xshash holatlar kuzatilishi kutilmoqda. “O‘zgidromet” ma’lumotlariga ko‘ra, oy boshlarida ob-havo quruq va nisbatan iliq bo‘ladi.
Biroq 3 yanvar atrofida nam havo massalari kirib kelishi sababli yomg‘ir yog‘ishi, ayrim joylarda esa yomg‘irning qor bilan almashishi ehtimoli bor. Tekislik hududlarida qor qoplami qisqa muddatli bo‘lishi yoki umuman shakllanmasligi mumkin.
Oy o‘rtalaridan boshlab havo asta-sekin soviy boshlaydi. Oy oxirida esa sovuq to‘lqinlar kirib kelishi kutilmoqda.
Natijada ayrim hududlarda kechasi havo harorati 15–25 daraja sovuq bo‘lishi mumkin.
