Saida Mirziyoyeva: Islohotlar qat’iyat va donolik talab qiladi
Prezident administratsiyasi rahbari Saida Mirziyoyeva o‘zining ilk katta intervyusida o‘z faoliyati, davlat rahbarining ish uslubi va administratsiya oldida turgan asosiy maqsadlar haqida batafsil ma’lumot berdi. Bu haqda Zamin.uz xabar berdi.
U Prezident administratsiyasining vazifalari haqida to‘xtalib, asosiy e’tibor strategik yo‘nalishlarni belgilash va ijro tizimi uchun aniq “yo‘l xaritasi”ni ishlab chiqishga qaratilishini ta’kidladi. Mirziyoyeva bugungi davrni islohotlar davri deb atab, o‘zgarishlar uzluksiz nazorat va mas’uliyat talab qilishini qayd etdi.
Intervyuda Saida Mirziyoyeva Prezident Shavkat Mirziyoyevning shaxsiy sifatlariga ham to‘xtaldi. U davlat rahbarini insonlarni tinglay oladigan, hurmat qiladigan va jamoani rivojlantira oladigan lider sifatida ta’rifladi.
Mirziyoyevaning fikriga ko‘ra, islohotlar faqat qat’iyat bilan emas, balki moslashuvchanlik va donolik orqali muvaffaqiyatga erishadi. U intervyu davomida administratsiya oldidagi beshta ustuvor yo‘nalishni sanadi: suv resurslari, ta’lim, tibbiyot, biznes muhiti va sud-huquq tizimi.
Ayniqsa, suv masalasini kelajakdagi eng jiddiy chaqiriqlardan biri sifatida ko‘rsatdi. Ta’lim va tibbiyot sohalaridagi islohotlar uzoq muddatli jarayon bo‘lib, ularga e’tibor qaratish zarurligini ta’kidladi.
Sud-huquq tizimi haqida esa shaffoflik va adolatning muhimligini qayd etdi. Uning fikriga ko‘ra, adolatli sud tizimi bo‘lmasa, boshqa islohotlar to‘liq samara bermaydi.
Chunki ishonch, investitsiya muhiti va fuqarolar huquqlari qonun ustuvorligiga bog‘liq. Shuningdek, Mirziyoyeva xalqaro diplomatiya va muloqotdan zavq olishini, asosiy maqsadi xalq hayotini yaxshilash ekanini yana bir bor ta’kidladi.
Uning aytishicha, prezidentga joylardagi real holat haqida to‘g‘ridan to‘g‘ri xabar berish va haqiqatni yashirmasdan yetkazish uchun tayinlangan. Umuman olganda, intervyuning asosiy xulosasi shundan iboratki, ustuvor yo‘nalishlar aniq belgilangan.
Endi asosiy vazifa — ijroni kuchaytirish va natijalarni sezilarli darajada amalga oshirishdir.
