Sun’iy intellekt tanlovi g‘oliblariga elektromobil topshiriladi
O‘zbekistonda sun’iy intellekt (SI) yo‘nalishida eng yaxshi natijalarga erishgan ikki maktab maxsus tanlov yakunlariga ko‘ra elektromobil bilan taqdirlanadi. Bu haqda Zamin.uz xabar berdi.
Bu haqda mamlakatda axborot texnologiyalari sohasini rivojlantirishga oid hukumat qarorida qayd etilgan. Ushbu yangilikni kursiv.uz nashri xabar berdi.
«Sun’iy intellekt sohasida besh million yetakchi» loyihasi doirasida o‘tkaziladigan tanlovda nafaqat maktablar, balki iqtidorli o‘quvchilar va yuqori natijalarga erishgan o‘qituvchilar ham rag‘batlantiriladi. Tanlov g‘olibi bo‘lgan eng yaxshi 10 nafar o‘qituvchi xorijda dam olish imkoniyatiga ega bo‘ladi.
Shuningdek, 100 nafar pedagogga 1 ming AQSh dollarigacha mukofot puli berilishi rejalashtirilgan. O‘quvchilar uchun esa noutbuklar va boshqa qimmatbaho sovg‘alar taqdim etilishi ko‘zda tutilgan.
Tanlov jarayonini adolatli va shaffof o‘tkazish vazifasi Raqamli texnologiyalar vazirligi hamda boshqa mas’ul idoralarga yuklatilgan. Hujjatda ta’kidlanishicha, sun’iy intellekt bo‘yicha besh million yetakchini tayyorlash tashabbusi «Bir million dasturchi» dasturining mantiqiy davomidir.
Bu tashabbus zamonaviy texnologiyalarni rivojlantirish va yosh avlodni IT yo‘nalishida yetuk mutaxassis sifatida tarbiyalashga qaratilgan.
