Saida Mirziyoyeva: Islohotlar endi boshlandi, muammolar ko‘p
Prezident administratsiyasi rahbari Saida Mirziyoyeva yaqinda Alter Ego mediaproektiga bergan intervyusida O‘zbekistonda davom etayotgan islohotlar haqida fikr bildirdi. Bu haqda Zamin.uz xabar berdi.
Unga ko‘ra, islohotlar hali endi boshlanmoqda va bu jarayon uzoq muddatli bo‘lib, hali yakuniga yetmagan. Mirziyoyeva islohotlar to‘xtab qolgani yoki rivojlanish sur’ati pasaygani haqidagi fikrlarni asossiz deb atadi.
Upl.uz saytining xabar berishicha, oraliq natijalar ijobiy bo‘lsa-da, hududlar kesimida hali ko‘plab muammolar mavjud. Saida Mirziyoyeva hududiy cheklovlar va geografik joylashuvni asosiy to‘siqlardan biri sifatida ko‘rsatib, O‘zbekistonning okeanga chiqish imkoniyati yo‘qligi eksport-import xarajatlarini oshirayotganini ta’kidladi.
Shuningdek, moliyaviy resurslarning yetishmasligi va eskirgan infratuzilma ham o‘z ta’sirini ko‘rsatmoqda. Unga ko‘ra, muhandislik va ijtimoiy tarmoqlarning aksariyati 1950–1970-yillarda barpo etilgan bo‘lib, ularni yangilash uchun katta mablag‘ talab qilinmoqda.
Shu sabab hukumat infratuzilmani bosqichma-bosqich yangilash strategiyasini tanlagan. Prezident administratsiyasi faoliyatida beshta asosiy yo‘nalish belgilangan: suv resurslari, ta’lim, sog‘liqni saqlash, tadbirkorlikni qo‘llab-quvvatlash va sud-huquq tizimini isloh qilish.
Suv masalasi eng muhim ustuvor yo‘nalish sifatida qayd etildi. Shuningdek, sud tizimidagi o‘zgarishlar shaffoflik va adolatni ta’minlashda muhim poydevor bo‘lishi aytildi.
Intervyu davomida Mirziyoyeva boshqaruv uslubi va ijro nazorati masalasiga ham to‘xtalib, maqsad “hisobot uchun chiroyli ko‘rinish” yaratish emas, balki real natijaga erishish ekanini ta’kidladi. Shuningdek, noto‘g‘ri ma’lumot berish urinishlari samarasiz ekani va ichki nazorat tizimi rahbariyatga vaziyatni xolis baholash imkonini berishini qayd etdi.
Mirziyoyeva boshqaruvdagi asosiy tamoyil sifatida proaktivlikni tilga olib, har bir muammo tizimni kuchaytirish uchun imkoniyat sifatida ko‘rilishi lozimligini ta’kidladi. U xalqaro diplomatiyaga qiziqishi va aloqalarni yo‘lga qo‘yish muhim ko‘nikma ekanini ham qayd etdi.
Shu bilan birga, logistika va transport yo‘nalishlarini rivojlantirish mamlakat islohotlarining muvaffaqiyatida hal qiluvchi omil ekanini alohida ta’kidladi.
