Toshkent aeroporti 2025 yilda 10 mln yo‘lovchiga xizmat qildi
Toshkent xalqaro aeroporti 2025 yilda 40 153 ta reys va qariyb 10 million yo‘lovchiga xizmat ko‘rsatib, O‘zbekistonning eng yirik aviatsion markazi sifatida o‘z mavqeini yana bir bor tasdiqladi. Bu haqda Zamin.uz xabar berdi.
Bu haqda "Uzbekistan Airports" kompaniyasi ma’lum qildi. Statistik ma’lumotlarga ko‘ra, yo‘lovchilar oqimi 2024 yilga nisbatan 14 foizga, reyslar soni esa 15 foizga oshgan.
Taqqoslash uchun, 2024 yilda aeroport 8,7 million yo‘lovchi va 34 789 ta reysni amalga oshirgan edi. Bunday o‘sishning asosiy sabablari sifatida yangi marshrutlarning ochilishi, parvozlar sonining ko‘payishi va yo‘lovchilarning harakatlanish faolligining ortishi ko‘rsatilmoqda.
Bu holat mamlakat transport infratuzilmasining rivojlanishi va Toshkentning O‘zbekiston aviatsiyasidagi asosiy markaz sifatidagi ahamiyatini yana bir bor namoyon etmoqda. Shu bilan birga, aeroportning texnik imkoniyatlari va xizmat ko‘rsatish sifati ham bu yutuqlarga katta hissa qo‘shgani ta’kidlanmoqda.
