Palov narxi viloyatlar bo‘yicha farq qilmoqda
Milliy statistika qo‘mitasi 2025-yil dekabr oyida bir kilogramm palov tayyorlash xarajatlarini hududlar bo‘yicha hisoblab chiqdi. Bu haqda Zamin.uz xabar berdi.
Ushbu hisob-kitoblar natijasi mahsulotlar narxi viloyatlar kesimida farq qilishini ko‘rsatmoqda. Qoraqalpog‘iston Respublikasida bir kilogramm palov tayyorlash uchun 97 727 so‘m sarflansa, Andijon viloyatida bu raqam 105 336 so‘mni tashkil etadi.
Buxoro viloyatida esa ushbu xarajat 107 175 so‘mga teng bo‘lgan. Jizzax viloyatida palov tayyorlash narxi 109 017 so‘mni, Qashqadaryo viloyatida 111 093 so‘mni, Navoiy viloyatida esa 109 169 so‘mni tashkil qilgan.
Namangan viloyatida xarajat 108 030 so‘m, Samarqand viloyatida 112 222 so‘m, Surxondaryo viloyatida 111 002 so‘m, Sirdaryo viloyatida esa 103 696 so‘m bo‘lgan. Toshkent viloyatida bir kilogramm palov tayyorlash uchun 111 857 so‘m, Farg‘ona viloyatida 114 890 so‘m, Xorazm viloyatida esa 106 527 so‘m sarflanishi hisoblab chiqilgan.
Eng yuqori ko‘rsatkich Toshkent shahriga to‘g‘ri kelgan bo‘lib, u yerda bir kilogramm palovning tannarxi 115 491 so‘mga yetgan. Mutaxassislarning ma’lumotiga ko‘ra, bir kilogramm palov tayyorlash uchun quyidagi mahsulotlar kerak bo‘ladi: 0,3 litr kungaboqar yog‘i, 300 gramm piyoz, 700 gramm mol go‘shti, 1 kilogramm sabzi, 1 kilogramm guruch, 100 gramm no‘xat, 10 gramm zira va 20 gramm osh tuzi.
Ta’kidlash joizki, bu raqamlar faqat mahsulotlarning narxini aks ettiradi. Tayyor palov narxi yoki xizmat ko‘rsatish uchun qo‘shimcha xarajatlar bu hisob-kitoblarga kiritilmagan.
Ma’lumot manbasi: Milliy statistika qo‘mitasi.
