O‘zbekiston iqlim xavflariga qarshi yangi choralar belgiladi
O‘zbekistonning "2030" strategiyasi doirasida iqlim o‘zgarishining salbiy ta’sirlariga qarshi kurash bo‘yicha yangi chora-tadbirlar belgilangan. Bu haqda Zamin.uz xabar berdi.
Ushbu strategiyada qurg‘oqchilik, cho‘llanish, chang-qum bo‘ronlari va haroratning ortishi kabi xavflarni kamaytirish asosiy yo‘nalishlardan biri sifatida e’tirof etilgan. Loyihaga ko‘ra, gidrometeorologik monitoring va prognozlash sifatini oshirish, qishloq xo‘jaligi uchun agrometeorologik ma’lumotlarni aniqlash hamda tabiiy resurslardan samarali foydalanish ustuvor vazifalar sifatida belgilangan.
Strategiya doirasida quyidagi maqsadlarga erishish rejalashtirilgan: xavfli gidrometeorologik hodisalar haqida barvaqt ogohlantirish tizimini 100 foizga yetkazish, tog‘ daryolari oqimining prognoz aniqligini 98 foizga oshirish, 600 ming gektar maydonda himoya o‘rmonzorlarini barpo etish va qishloq xo‘jaligi ekinlari hosildorligi bo‘yicha prognozlarning ishonchliligini 96 foizga yetkazish. Shuningdek, foydali qazilmalar qazib olingan hududlarning 6 075 gektarini qayta tiklash va har bir hudud iqlimiga mos, yuqori hosildor ekin navlarini yaratish orqali hosildorlikni 30-35 foizga oshirish ko‘zda tutilgan.
Mazkur loyiha tabiiy ofatlar xavfini oldindan baholash, aholini o‘z vaqtida xabardor qilish, suv resurslarini samarali boshqarish va qishloq xo‘jaligini iqlim o‘zgarishlariga moslashtirishga qaratilgan. Bu chora-tadbirlar O‘zbekistonning ekologik barqarorligini oshirish va jahon miqyosida barqaror rivojlanish yo‘lida muhim qadamlardan biri bo‘lib xizmat qiladi.
Manba: Zamin.uz
