O‘zbekiston fuqarolari uchun vizasiz davlatlar 50 taga yetadi
O‘zbekiston 2030-yilga kelib, fuqarolari vizasiz borishi mumkin bo‘lgan davlatlar sonini 50 taga yetkazishni rejalashtirmoqda. Bu haqda Zamin.uz xabar berdi.
Bu maqsad 2026–2030-yillarga mo‘ljallangan rivojlanish strategiyasida belgilangan. Hujjatda qayd etilishicha, joriy yilning o‘zida yana ikki davlat bilan vizasiz yoki soddalashtirilgan kirish tartibi bo‘yicha kelishuvlarga erishish ko‘zda tutilgan.
Shuningdek, 2027-yilda bunday kelishuvlar soni beshtaga yetkazilishi rejalashtirilgan. Rejaga ko‘ra, vizasiz yo‘nalishlar soni 2028-yilda 45 taga, 2029-yilda 48 taga, 2030-yilda esa 50 taga yetishi kutilmoqda.
Shu bilan birga, 2026–2030-yillar davomida elektron viza va aeroportda rasmiylashtiriladigan viza kabi yengillashtirilgan tartiblar mavjud bo‘lgan davlatlar sonini 60 taga yetkazish maqsad qilingan. Bundan tashqari, yaqin yillarda konsullik xizmatlari uchun maxsus mobil platforma ishga tushiriladi.
Ushbu platforma yordamida foydalanuvchilar sonini oshirish rejalashtirilgan. Hozirda undan 8,5 ming kishi foydalanmoqda, 2026-yilda bu ko‘rsatkich 15 mingga, 2030-yilda esa 100 mingga yetkazilishi mo‘ljallangan.
Tashqi ishlar vazirligi ma’lumotlariga ko‘ra, bugungi kunda O‘zbekiston fuqarolari 35 ta davlatga vizasiz safar qilish imkoniyatiga ega. Yana 42 ta mamlakat turli shakldagi soddalashtirilgan kirish tartiblarini taklif etadi.
Bu kabi chora-tadbirlar mamlakatning xalqaro hamkorlik va sayohat imkoniyatlarini kengaytirishga xizmat qiladi. Ma’lumot manbasi: One.uz.
