Soliq qo‘mitasi: Onlayn-kassa ishlatish majburiy!
O‘zbekiston Respublikasi Soliq qo‘mitasi tadbirkorlar uchun muhim ogohlantirish e’lon qildi. Bu haqda Zamin.uz xabar berdi.
Matbuot xizmatining xabar berishicha, aholiga xizmat ko‘rsatish va savdo jarayonlarida onlayn-kassa yoki virtual kassa tizimlaridan foydalanish majburiy hisoblanadi. Ushbu talab soliq qonunchiligiga muvofiq joriy etilgan bo‘lib, uning buzilishi jiddiy javobgarlikka olib keladi.
Qo‘mita ma’lumotlariga ko‘ra, mijoz to‘lovni terminal orqali amalga oshiradimi yoki naqd pul shaklida to‘laydimi, har qanday holatda ham unga QR-kod va fiskal belgi tushirilgan chek taqdim etilishi shart. Bundan tashqari, boshqa shaxs nomiga ro‘yxatdan o‘tgan to‘lov terminallaridan foydalanish qat’iyan taqiqlanadi.
Elektron tijorat platformalari yoki elektron to‘lov tizimlari orqali amalga oshiriladigan to‘lovlarda esa xaridorga elektron fiskal chek berilishi lozim. Agar ushbu talablar buzilsa, Soliq kodeksining 221-moddasiga asosan jarimalar qo‘llanadi.
Xususan, kassa apparati yoki to‘lov terminalisiz savdo qilish, majburiy hujjatlarni (kvitansiya, chek va boshqalar) bermaslik yoki terminal orqali to‘lovni rad etish 5 million so‘m miqdorida jarimaga olib keladi. Shuningdek, ro‘yxatdan o‘tmagan kassa apparati yoki terminaldan foydalangan holda savdo qilish yoki xizmat ko‘rsatish uchun 7 million so‘m jarima belgilangan.
Alohida qayd etilishicha, texnik talablarga javob bermaydigan yoki nosoz kassa apparatlarini ishlatish, shuningdek, boshqa shaxs nomiga ro‘yxatdan o‘tgan terminallarni qo‘llash holatlarida jarima miqdori 20 million so‘mni tashkil etadi. Ushbu talablarni buzmaslik tadbirkorlarning javobgarligini oshiradi va qonuniy faoliyat yuritishga xizmat qiladi.
Manba: upl.uz
