O‘zbekiston vizasiz davlatlar sonini 50 taga yetkazadi

O‘zbekiston 2030 yilga qadar fuqarolar uchun vizasiz borish mumkin bo‘lgan davlatlar sonini 50 taga yetkazishni rejalashtirmoqda. Bu haqda Zamin.uz xabar berdi.

Ushbu maqsad 2026–2030 yillarga mo‘ljallangan yangilangan rivojlanish strategiyasi loyihasida o‘z aksini topgan. Bu haqda *Podrobno.uz* nashri xabar berdi.

Hujjatga ko‘ra, vizasiz yoki soddalashtirilgan kirish tartiblari bo‘yicha kelishuvlar bosqichma-bosqich kengaytiriladi. Xususan, 2026 yilda yana 2 ta, 2027 yilda esa 5 ta yangi davlat bilan kelishuvlar imzolanishi rejalashtirilgan.

Natijada vizasiz yo‘nalishlar soni 2028 yilga kelib 45 taga, 2029 yilda 48 taga, 2030 yilga borib esa 50 taga yetishi kutilmoqda. Shu bilan birga, kirish tartibi yengillashtirilgan mamlakatlar ro‘yxatini ham oshirish rejalashtirilgan.

2026–2030 yillar davomida bunday davlatlar sonini 60 taga olib chiqish maqsad qilingan. Bu ro‘yxatga elektron viza, aeroportda viza yoki boshqa yengillashtirilgan kirish tartibini joriy qilgan davlatlar kiradi.

Bundan tashqari, yaqin yillarda konsullik xizmatlarini olishni osonlashtirish maqsadida mobil platforma ishga tushirilishi ko‘zda tutilgan. Ushbu raqamli xizmat orqali foydalanuvchilar soni 2026 yilda 15 mingga, 2030 yilga borib esa 100 ming kishiga yetishi prognoz qilinmoqda.

Ma’lumotlarga ko‘ra, hozirda O‘zbekiston fuqarolari 35 ta davlatga vizasiz borish imkoniyatiga ega. Bunga qo‘shimcha ravishda, 42 ta mamlakat turli ko‘rinishdagi soddalashtirilgan kirish tartibini taklif qilmoqda.

Bu kabi yangiliklar fuqarolar uchun xalqaro safarlarni osonlashtirishga xizmat qiladi.